આત્મનિર્ભર લોન ગરીબો માટે હથેળીમાં ચાંદ જેવી

લૉકડાઉનમાં ધંધા રોજગાર બંધ હોવાથી સમાજના દરેક વર્ગની આર્થિક પરિસ્થિતિ કથળી ગઇ છે. સરકારે અનલોક 1, 2, 3, 4 જાહેર કર્યા પછી પણ મોટાભાગના ધંધા રોજગારોમાં મંદીની અસર જોવા મળી રહી છે. ત્યારે અર્થતંત્રને ફરીથી પાટા પર લાવવા માટે સરકારે બેંકો મારફતે આત્મનિર્ભર લોન આપવાની જાહેરાત કરી છે. જોકે આ લોન મેળવવી સામાન્ય વ્યક્તિની પહોંચની બહાર છે.

મોડાસા- સરકારે આત્મનિર્ભર લોનની જાહેરાત કરી ત્યારે નાના મધ્યમ વર્ગના વ્યક્તિઓ જેઓના ધંધારોજગાર પર લોકડાઉનની માઠી અસર પડી છે તેમને આશાનું કિરણ દેખાયું હતું. પરંતુ આ કિરણ બેંકોની અવળચંડાઇરૂપી વાદળોમાં ઘેરાઇ ગયું છે. સરકારની બે ટકાવાળી લખટકીયાની લોન લેવા બેંકોના ચક્કર કાપી ગરીબ મધ્યમ વર્ગના અરજદારો ચપ્પલ ઘસી રહ્યાં છે. પરંતુ લોન મળે તેવી દૂરદૂર સુધી કોઇ શક્યતા ન જોવા મળતાં અરજદારો નિરાશ થયાં છે. મોટાભાગની બેંકોએ તેમને આત્મનિર્ભર લોન આપવાનો નનૈયો ભણ્યો છે. તો કેટલીક બેંકોના તો લોન આપવાના નિયમ જ તેમની પહોંચની બહાર છે. ત્યારે નાના વેપારીઓ, મધ્યમ તથા શ્રમિક વર્ગ અને વ્યક્તિગત કારીગરો માટે સરકારની આત્મનિર્ભર લોન હથેળીમાં ચાંદ જેવી સાબિત થઇ રહી છે.

આત્મનિર્ભર લોન ગરીબો માટે હથેળીમાં ચાંદ જેવી

તો બીજી બાજુ કેટલાક દિવસ અગાઉ અરવલ્લી જિલ્લાના બેન્ડ એસોસિએેશન લોન મેળવવામાં પડતી તકલીફો અંગે જિલ્લા કલેકટરને આવેદનપત્ર આપ્યું હતું. અરવલ્લી જિલ્લામાં લગ્ન અને ખુશીના પ્રસંંગોમાં ગીત સંગીત વગાડી પોતાનું ગુજરાન ચલાવતાં બેન્ડવાળાઓ આર્થિક રીતે પડી ભાંગ્યાં છે. કોરોનાવાયરસને લઇને આ વર્ષે લગ્ન અને પ્રસંગો બંધ રહેતાં તેમનો ધંધો ઠપ છે. છેલ્લાં દિવસોથી બેકાર બેઠેલાં બેન્ડવાળા ભાઇઓમાં જ્યારે સરકારે આત્મનિર્ભર લોનની જાહેરાત કરી ત્યારે થોડી આશા જાગી હતી પરંતુ તે ઠગારી નીવડી છે.

અરવલ્લીની કેટલીક સહકારી બેંકોમાં લોનના ફોર્મનું વિતરણ કરવામાં આવ્યાં છે. જોકે અરજદારોના જણાવ્યાં અનુસાર બેંકોએ ફકત જૂના લોનધારકોને તેમની હાલ ચાલુ લોનમાં એક લાખની લોન એડજસ્ટ કરી સરકારની આંખમાં ધૂળ નાંખવાની કોશિશ કરી છે. જ્યારે નવા અરજદારો જે ખરેખર જરૂરતમંદ છે તેમને ફકત રૂ. 25 હજારની લોન આપવામાં આવશે તેવું રોકડું પરખાવામાં આવી રહ્યું છે.સરકારના સરાહનીય પગલાંને પોતાના સ્થાપિત હિતો માટે સહકારી બેંકોના સત્તાધીશોએ મનસ્વી નિર્ણયો કરી જરૂરિયાતમંદ લોકોને વંચિત રાખ્યાં છે ત્યારે આ મામલે રાજ્ય સરકાર લેવલે ઉચ્ચસ્તરીય તપાસ થાય તેવું લોનવાંચ્છુઓ ઇચ્છી રહ્યાં છે.