સરડોઈ નજીક ડુંગર પર આવેલા ચામુંડા માતાજીના મંદિર નજીક જંગલમાં શનિવારે સવારે અગમ્ય કારણોસર આગ લાગતા આગ દોઢથી ૨ કિલોમીટર વિસ્તારમાં પ્રસરતા ભારે ચકચાર મચી હતી. જંગલમાં લાગેલા દાવાનળથી અસંખ્ય પક્ષીઓ અને પ્રાણીઓ સહિત મોટાભાગની વનરાજી બળીને ખાખ થઈ ગઈ હતી. આ આગથી વન્યપ્રેમીઓ અને જીવદયા પ્રેમીઓમાં ભારે નિરાશા સાંપડી હતી.
ડુંગર પર જંગલ વિસ્તારમાં આગ
આ આગ લાગવાની ઘટનાની જાણ થતા દોડી આવેલા વનવિભાગના કર્મચારીઓએ ગ્રામજનોની મદદથી સાંજે ૪ વાગ્યાના સુમારે ફાયરપટ્ટાની મદદથી આગ પર કાબુ મેળવવામાં આંશિક સફળતા મળી હતી. આગનું ભયાનક સ્વરૂપ નિહાળી સરડોઇ ગ્રામજનો સહિત ડુંગરની તળેટીમાં આવેલા ગ્રામ્ય વિસ્તારના પ્રજાજનોમાં ભારે ફફડાટ જોવા મળ્યો હતો.
