મોડાસાઃ આગામી સોળ જાન્યુઆરીથી કોરોના વેક્સિનેશનની પ્રક્રિયા શરૂ થવાની છે, ત્યારે અરવલ્લી જિલ્લામાં કોરોના વેક્સીનનો જથ્થો મોડાસા ખાતે આવી પહોંચ્યો હતો. રાજ્યકક્ષાએથી અરવલ્લી જિલ્લામાં કુલ 12,640 ડોઝ મોકલવામાં આવ્યા છે. જેના થકી પ્રથમ તબક્કામાં કુલ 10,340 જેટલા આરોગ્ય કર્મચારીઓને સરીકરણથી આવરી લેવામાં આવશે. આગામી બે દિવસમાં જિલ્લાના છ તાલુકાઓમાં વેક્સીન પહોંચાડવામાં આવશે.
ઇન્ટ્રામસ્ક્યુલર રૂટથી રસી આપવામાં આવશે
અરવલ્લી જિલ્લાના મુખ્ય મથક મોડાસાની તાલુકા આરોગ્ય કચેરી ખાતે સીરમ ઇન્સટીટ્યુટ ઓફ ઇન્ડીયા પ્રા.લિ દ્વારા બનાવવામાં આવેલા કોવિડ-19 વેકસીનના 12,640 ડોઝ આવી ચુક્યા છે. જેના થકી પ્રથમ તબક્કામાં 10,340 આરોગ્યની કામગીરી સાથે સંકળાયેલા કર્મચારીઓને રસીકરણથી આવરી લેવામાં આવશે. કોવિડ-19 ના કુલ બે ડોઝ આપવામાં આવશે. દરેક ડોઝ 0.5 ml ઇન્ટ્રામસ્ક્યુલર રૂટ થી આપવામાં આવશે. રસીકરણનો પ્રથમ ડોઝ આપ્યા પછી બીજો ડોઝ 28 દિવસ બાદ આપવામાં આવશે. આ અંગેની વધુ માહિતી અરવલ્લી જિલ્લા કલેકટર અમૃતેશ ઔરંગાબાદકર દ્રારા આપવામાં આવી હતી.
રસીકરણ બુથ પર પાંચ કર્મચારીઓની ટીમ પોતાની ફરજ બજાવશે
કોવિડ-19 રસી લીધા પછી લાભાર્થીઓને વેક્સિનેશન કેન્દ્રમાં અડધો કલાક નિરીક્ષણ હેઠળ રાખવામાં આવશે. જિલ્લામાં તાલીબદ્વ આરોગ્ય કર્મીઓ દ્વારા કોવિડ રસીકરણ કરવામાં આવે તે મુજબ આયોજન કરેલું છે. કોવિડ-19 રસીકરણ બુથ પર પાંચ કર્મચારીઓની ટીમ પોતાની ફરજ બજાવશે. કોવિડ-19 રસીકરણ કાર્યક્રમ બાબતે જિલ્લા કક્ષાએ અને તાલુકા કક્ષાએ ગુણવત્તા જળવાઈ રહે તે માટે કોલ્ડ ચેઇન અંગેની તેમજ અન્ય તમામ તૈયારીઓ પૂર્ણ કરવામાં આવી છે.
દરેક તાલુકાના 100 અરોગ્ય કર્મચારીઓને રસી આપવામાં આવશે
તારીખ 16.1.2020 ના રોજ અરવલ્લી જિલ્લામાં પ્રથમ કોવિડ-19 રસીકરણ કાર્યક્રમ દરેક તાલુકા ક્ક્ષાએ નીચે દર્શાવ્યા મુજબના સ્થળોએ યોજાશે. દરેક સ્થળ ઉપર 100 મુજબ કુલ 600 આરોગ્યની કામગીરી સાથે સંકળાયેલા કર્મચારીઓને તારીખ 16.1.2020 ના રોજ કોવિડ રસીકરણથી આવરી લેવામાં આવશે.
