"ગુટખા ચોર" ગેંગના ત્રણ સભ્યોની ધરપકડ

આણંદ:ઉમરેઠ શહેરમાંથી આશરે બે મહિના અગાઉ બસ સ્ટેન્ડ પાસે આવેલા એક પાન મસાલાના ગોડાઉનમાંથી લાખો રૂપિયાની કિંમતના પાન મસાલાના કાર્ટૂનની ચોરી કરી ફરાર થઈ જનાર માલેગાવની 'ગુટખા ચોર ગેંગ'ના ત્રણ સભ્યોની આણંદ એલસીબીએ ધરપકડ કરી આગળની વધુ તપાસ હાથ ધરી છે.

ઉમરેઠ બસ સ્ટેન્ડ પાસે બે મહિના પહેલા 'પદ્માવતી લીલા ગોડાઉન'ના દરવાજાના લોક તોડી વિમલ પાન મસાલાના 25 કાર્ટૂનની ચોરી થઈ હતી. જે મામલે ઉમરેઠ પોલીસ મથકે ગુનો નોંધાતા સમગ્ર મામલાની તપાસ પહેલા ઉમરેઠ પોલીસ અને ત્યારબાદ આણંદ એલસીબી દ્વારા હાથ ધરવામાં આવી હતી. જેમાં ઉમરેઠ અને તેની આસપાસના હાઇવે પર સીસીટીવી કેમેરા ચેક કરતા અને બાતમીદારોના નેટવર્કથી ચોરીની તપાસમાં મહારાષ્ટ્રના નાસિક જિલ્લાના માલેગાંવના ઇસમો દ્વારા ચોરી કરવામાં આવતી હોવાની વાત સામે આવતા આણંદ એલસીબીના સ્ટાફે 9 દિવસ પહેલાં આણંદ એલસીબીથી 6 વ્યક્તિની ટીમ બનાવી માલેગાવ રવાના થયા હતા. જ્યાં તપાસ હાથ ધરી અને ત્રણ જેટલા શખ્સોને દબોચ્યા હતા.

આણંદ એલ.સી.બી.ની એક ટીમ માલેગાવ જઇ સઘન તપાસ કરતા માલેગાવના કુખ્યાત ગુડખા ગેંગના શાહિદ અહમદ એ અન્સારીનું નામ સામે આવતા આણંદ એલસીબીએ માલગામ પોલીસની મદદથી મુખ્ય આરોપી શાહિદ એહમદની ધરપકડ કરી માલેગાવમાં તેની પૂછપરછ કરતાં તેના અન્ય એક સાથી અને ચોરી સમયે ટ્રક ડ્રાઈવર તરીકે કામગીરી કરતા શાહરૂખ અમીન શેખનું નામ ખુલ્યું હતું. આ બંને આરોપીઓની ધરપકડ કરી આણંદ ખાતે લઈ આવ્યા હતા. જ્યાં તેને આ ગુનામાં ત્રણ આરોપીઓની ધરપકડ કરી ઉમરેઠ કોર્ટમાં રજૂ કરાતા કોર્ટે ચોરી કરનાર માલેગાંવના બે આરોપીઓને 12 દિવસના રિમાન્ડ અને માલની ચોરી કર્યા બાદ ખરીદનાર આરોપીને 3 દિવસના રિમાન્ડ પર મોકલી આપવાના હુકમ કર્યા છે.