આમ તો 31 ડિસેમ્બર હોય કે ટુરીસ્ટ પ્લેસ, શોખ માટે દારૂનો ટેસ્ટ કરવાનો ક્રેઝ યુવાનોમાં વધી રહ્યો છે. ત્યારે આવા ટેસ્ટ જિંદગીમાં કેટલો મોંઘો પડે છે તેનો પરાગ શાહે અનુભવ કર્યો છે. તેમનું માનવું છે કે, આજે મોટાભાગના યુવાનો નાની-નાની વાતમાં પાર્ટી કરતા હોય છે, તેઓ મારા ઉદાહરણથી ચેતશે તો મને અનહદ આનંદ થશે. કોઈના ઘરમાં વ્યસની એમ કહે કે તેને દેવું છે, ટેન્શન છે તેમજ પત્ની સારી નથી જેવા બહાના કાઢીને પોતાના મોજ શોખ માટે પીતો હોય છે, માટે મહેરબાની કરીને તેમની વાતોમાં આવશો નહીં.
પરાગભાઈએ જણાવ્યું કે, “આજથી 25 વર્ષ પહેલા હું કોલેજમાં ભણતો હતો, ત્યારે મિત્રોની સાથે માઉન્ટ આબુમાં જઈને પહેલીવાર આલ્કોહોલનો ટેસ્ટ કર્યો હતો. પછી મને લત લાગતાં મેં દિવસ કે રાત જોયા વગર 20 વર્ષ સતત દારૂ પીધો હતો. જેના કારણે જિંદગીના અમૂલ્ય વર્ષો વેડફાયા હતા. મારા લગ્ન પછી પત્ની બીનાએ મને વારંવાર ટોક્યો, તેમ છતાં મને તેની ક્યારેય દયા આવી નહીં એનો આજે મને અફસોસ થાય છે. વધારેમાં પેરાલિસિસથી પીડાતાં મારા પિતાજી મને ઘણી વાર કહેતા કે તું ઘરે ન આવીશ, તેમ છતાં મોડી રાત્રે ચૂપચાપ આવીને સૂઈ જતો.”
આ ઉપરાંત તેમણે જણાવ્યું કે, “ઘણીવાર પિતાને સારૂં લાગે તે માટે તીર્થયાત્રાએ પણ જતો, તેમ છતાં મારું વ્યસન છૂટ્યું નહીં. તેમના કહેવા મુજબ મારા સંતાનો ક્યારે સ્કૂલે ગયા અને ક્યારે પાછા આવ્યા તે પણ મને ક્યારેય ખબર ન હતી. અનેક અરમાનો લઈને ઘરમાં આવેલી મારી પત્ની બીનાએ મને 14 વર્ષ સુધી સહન કર્યો છે. શેરબજારમાં બિઝનેસ માટે મુંબઈ-દિલ્હી જેવા શહેરોમાં જતો હતો, ત્યાં એક પણ રાત દારૂ વગર ખાલી જતી નહીં. મેં એક કરોડ રૂપિયાનો દારૂ પીધો હશે અને મિત્રોને પીવડાવ્યો હશે. આજના યુવાનોને એટલું જ કહીશ કે મને પુનર્જન્મ મળ્યો છે, માટે તમે સાવધાન રહેજો, કેમ કે એક વ્યસન ઘરના બધા સભ્યો માટે નર્ક સમાન બની જાય છે.”
