NCP કાર્યકર્તા પોલીસ કર્મીઓના ગ્રેડ-પે મામલે સોશિયલ મીડિયા પર વીડિયો મૂકી આંદોલન કરશે

પોલીસ વિભાગના કર્મચારીઓ ગ્રેડ-પે વધારાની માંગ પર રાજ્યના પોલીસ વડાએ તેમના વિભાગીય કર્મચારીઓને આવી પ્રવૃતિમાં ન જોડાવવા અને શિસ્ત રાખવાનો આદેશ કર્યો છે. ત્યારે NCPએ આ મુદ્દે સોશિયલ મીડિયા પર માંગ કરનાર કર્મીઓને સમર્થન પૂરું પાડ્યું છે. ગ્રેડ -પે મુદ્દે NCP સોશિયલ મીડિયા પર આંદોલન ચલાવશે.

અમદાવાદ: ગુજરાત પ્રદેશ NCP દ્વારા જારી કરવામાં આવેલી પ્રેસ રીલીઝમાં જણાવવામાં આવ્યું છે કે , પોલીસ તંત્ર શિસ્તના કારણે પોતાનો અવાજ ઉઠાવી શકતો નથી. જ્યારે મજબૂરી ઉઠાવે છે. ત્યારે તેમનો અવાજ દબાવી દેવાનો પ્રયાસ કરવામાં આવે છે. NCPએ આ બાબતનો વિરોધ કરતા કહ્યું કે, પોલીસ કર્મીઓની માંગણીને ધ્યાનમાં રાખીને સમજી વિચારીને નિર્ણય લે.

ગુજરાત પ્રદેશ NCPએ જણાવ્યું હતુ કે, તેઓ લોકશાહી બચાવવા તેમની પાર્ટીના કાર્યકર્તા ગ્રેડ-પે મુદ્દે સોશિયલ મીડિયા પર વીડિયો મુકશે, અને પોલીસ કર્મીઓને તેમનું સમર્થન પૂરું પાડશે.શિક્ષકોના ગ્રેડ-પે વિવાદ બાદ સોશિયલ મીડિયા પર પોલીસ કર્મીઓનો ગ્રેડ-પે 1800માંથી વધારીને 2800 કરવાની પોસ્ટ વહેતી થઈ હતી. ત્યારબાદ રાજ્યના પોલીસ વડા શિવાનંદ ઝાએ પોલીસ કર્મીઓને આ પ્રકારની પોસ્ટથી દૂર રહેવાનો આદેશ કર્યો હતો.

ઉલ્લેખનીય છે કે શિક્ષકોના 4200 ગ્રેડ-પેના વિવાદ મુદ્દે નાયબ મુખ્ય પ્રધાન નીતિન પટેલે સ્પષ્ટતા આપતા જણાવ્યું હતું કે, સરકાર દ્વારા કોઈના ગ્રેડ-પે વધારવામાં આવ્યા નથી. શિક્ષકોનો ગ્રેડ-પે 4200 જ હતો. જે ભૂલથી 2800 કરી દેવાયો હતો જે હવે પાછો સુધારવામાં આવ્યો છે.