અમદાવાદ મ્યુનિસિપલ કોર્પોરેશનના ફ્લાવર શૉ નો પ્રારંભ

અમદાવાદઃ મ્યુનિસિપલ કોર્પોરેશનનો ફ્લાવર શો શરુ થઈ ચૂક્યો છે. જાહેર જનતામાં કેટલીક થીમ આકર્ષણનું કેન્દ્ર બની રહી છે. જેમાં શહેરના ફાયર વિભાગ દ્વારા રજૂ કરાયેલી થીમ પણ છે. આગની ઘટનાઓને લઇને જનજાગૃતિના પ્રયાસ તરીકે રજૂ થયેલી વી સર્વ ટુ સેવ થીમ સાથેની આ થીમ ખાસ બની રહી છે. આ થીમને રજૂ કરવા માટે ફાયર ફાઈટરને વિવિધ ફૂલોથી શણગારવામાં આવ્યા હતાં. તો 'વી સર્વ ટુ સેવ'ના સ્લોગનને ફૂલોથી શુશોભિત કરી ફાયર વિભાગની કામગીરીને બિરદાવવામાં આવી હતી.

આ સંદર્ભે ઈટીવી ભારત સાથેની ખાસ વાતચીતમાં ચીફ ફાયર ઓફિસર રાજેશ ભટ્ટે જણાવ્યું હતું કે, દર વર્ષે કોર્પોરેશન ફ્લાવર શોમાં ફૂલ અને વનસ્પતિથી હરીયાળી વિશે લોકોને માહિતગાર કરે છે, ત્યારે લોકો આગ જેવી ઘટનાને ગંભીરતાથી લે તેના માટે 'વી સર્વ ટુ સેવ'ની થીમને ફ્લાવર શોમાં મૂકવામાં આવી છે. લોકો આગની ઘટનાને ટાળવા માટે સલામતીના ઉપકરણો લગાવે તેવી આશા વ્યકત કરી હતી.

ઉલ્લેખનીય છે કે, શનિવારે મુખ્યપ્રધાન વિજય રૂપાણી દ્વારા ફ્લાવર શો 2020ને ખુલ્લો મૂકવામાં આવ્યો હતો. શહેરને ગ્રીન અને સ્વચ્છ રાખવાના હેતુથી કોર્પોરેશન અને રાજ્ય સરકારના સંયુકત ઉપક્રમે મહત્મા ગાંધીની 150મી જન્મજંયતિ નિમિત્તે વિવિધ થીમ પર દેશવિદેશના લાખો ફૂલોનો ફ્લાવર શો આહલાદક ઠંડીમાં નગરજનોના મનોરંજનનું નવું સરનામું બની રહેશે.