અમદાવાદઃ લોકડાઉનમાં સહુથી વધુ મુશ્કેલી લોકોને ધંધા રોજગાર બંધ રહેવાથી પડી, પરંતુ આ બાબતમાં વડોદરા સેન્ટ્રલ જેલના કેદી બંધુઓ ભાગ્યશાળી પુરવાર થયાં છે એવું કહેવું ખોટું નહીં ગણાય.
વડોદરા સેન્ટ્રલ જેલમાં કેદી કલ્યાણ અને સુધારણાના અભિગમ હેઠળ અનેક પ્રકારની ઉત્પાદકીય પ્રવૃત્તિઓ ચલાવવામાં આવે છે.જેને પગલે કેદી બંધુઓને નવા હુન્નરો અને કૌશલ્યો શીખવા મળે છે. આ ઉત્પાદકીય કામગીરીના વળતર રૂપે નિર્ધારિત મહેનતાણાની આવક થાય છે અને સજા પૂરી કરીને નીકળતા કેદીઓ સમાજમાં એક કુશળ કારીગર તરીકે પાછા ફરે છે.
લોકડાઉનમાં દરજી કામ વિભાગના 10 કેદીઓએ 20 હજાર માસ્ક બનાવ્યા છે. એવી જાણકારી આપતાં જેલ અધિક્ષક બળદેવસિંહ વાઘેલા એ જણાવ્યું હતું કે, આ માસ્ક તમામ કેદીઓ, અધિકારીઓ અને કર્મચારીઓ ઉપરાંત અન્ય કચેરીઓને પૂરાં પાડવામાં આવ્યાં. તે જ રીતે આ સમયગાળામાં અન્ય 10 કેદીઓએ કાર્બોલિક સાબુ, લિકવિડ હેન્ડ વોશ, લીમડાના સાબુ અને ફિનાઇલનું ઉત્પાદન કર્યું. તેમણે 59 હજાર નંગ સાબુ, 6250 લિટર ફિનાઇલ,2100 લિટર લીકવિડ હેન્ડ વોશનું ઉત્પાદન કરીને લોકડાઉનને જાણે કે, પરિશ્રમનો ઉત્સવ બનાવ્યો.
આ સામગ્રી રાજ્યની અન્ય તમામ જેલોને જરૂરિયાત પ્રમાણે પૂરી પાડવામાં આવી છે. આ મહેનતના બદલામાં કેદીઓને એમને ઠરાવેલા દરે મહેનતાણાની આવક થઇ છે.
જેલવાસીઓની રોગ પ્રતિકારક શકિત વધે તે માટે આયુર્વેદિક ઉકાળો આપવામાં આવે છે. જે કેદીઓ જાતે જ બનાવે છે. લોકડાઉનમાં પણ સેન્ટ્રલ જેલમાં અનુકૂળતા પ્રમાણે અને સોશિયલ ડિસ્ટન્સના નિયમો પાળીને દરજી કામ વિભાગ,સાબુ અને રસાયણ વિભાગ જેવા વિભાગોમાં ઉત્પાદકીય પ્રવૃત્તિઓ ચાલુ રાખવામાં આવી જેના પરિણામે તેની સાથે જોડાયેલા કેદીઓએ પરિશ્રમ કર્યો અને કમાણી પણ કરી.
