અમદાવાદમાં પાણીનાં ધાંધીયા, મહિલાઓએ માટલાઓ ફોડી નોંધાવ્યો વિરોધ

અમદાવાદ: શહેરમાં ગરમીનો પારો સતત વધી રહ્યો છે. ત્યારે સમગ્ર રાજ્યના ગ્રામ્ય વિસ્તારોમાં તો પાણીની સમસ્યા નોંધાઇ રહી છે. પરંતુ રાજ્યનું હબ એવા અમદાવાદ શહેરમાં પણ પાણીનાં ધાંધિયા છે. આજે શહેરના મકતમપુર વોર્ડની મહિલાઓ યુથ કોંગ્રેસના કાર્યકરો સાથે વોર્ડ ઓફીસમાં પહોંચી હતી. ત્યારે મહિલાઓ રણચંડી બની કોર્પોરેશનની હાય હાયના નારાઓ પોકાર્યા હતા. તો આ સાથે જ કચેરીની બહાર માટલા ફોડી વિરોધ પણ નોંધાવ્યો હતો.

અમદાવાદ શહેરના અનેક વિસ્તારોમાં નિયમિત પાણી મળતું નથી. વેજલપુર વિધાનસભાનાં મકતમપુર વોર્ડની સ્થાનિક મહિલાઓ અને યુથ કોંગ્રેસના કાર્યકરો રેલી સ્વરૂપે વોર્ડ કચેરીએ પહોંચ્યા હતાં. જ્યાં કોંગ્રેસ કાર્યકરો અને મહિલાઓ દ્વારા સીટી ઈજનેરને પાણીની સમસ્યા અંગે રજુઆત કરી આવેદનપત્ર પાઠવ્યુ હતું. ટેન્કર મારફતે પાણી આપવાની માંગ કરી હતી.

રમઝાન માસમાં આંકરા ઉનાળામાં પાણી માટે વલખા મારવા પડતા હોવાથી મહિલાઓ માટલા ફોડી રોષ પ્રગટ કર્યો હતો. લોકોએ અમદાવાદ મહાનગરપાલિકાની હાય..હાય પણ બોલાવી હતી. તો આ સમસ્યાઓનું નિરાકરણ નહિ આવે તો કોર્પોરેશનની ઓફિસની બહાર ધરણા કરવામાં ચિમકી પણ મહિલાઓએ ઉચ્ચારી હતી.