રોડની રજૂઆત મામલે ઉગ્ર બોલાચાલી, કમિશ્નરે કોર્પોરેટરને કહ્યું- "સ્ટુપિડ, બ્લડી-રાસ્કલ"

અમદાવાદ: સોમવારે અમદાવાદ મ્યુનિસિપલ કોર્પોરેશનની નવા પશ્ચિમ ઝોન ખાતે આવેલી ઓફિસમાં બેઠક યોજાઇ હતી. જેના 10 થી 15 મિનિટ બાદ કોર્પોરેટરોએ 2017થી રોડ નહીં બનવાની રજૂઆત મ્યુનિસિપલ કમિશનર વિજય નેહરા સમક્ષ કરી હતી. રજૂઆત ઉગ્ર બનતા મ્યુનિસિપલ કમિશનર બેઠક છોડીને ચાલ્યા ગયા હતા.

અમદાવાદ શહેરમાં છેલ્લા ઘણા સમયથી રોડ રસ્તા ખરાબ હોવાની સતત ચર્ચાઓ ચાલી રહી છે. જેની અસર કમિશનર વિજય નેહરા પર થઇ છે. રસ્તાના મુદ્દે ચૂંટાયેલા કોર્પોરેટરોએ કમિશનર સમક્ષ વાતો રજૂ કરતા તેઓ લાલ પીળા થઇ ગયા હતા. ચર્ચાનું રુપ ઉગ્ર બોલાચાલીએ લઇ લીધું હતું. કમિશનરે કોર્પોરેટરને સ્ટુપિડ અને બ્લડી, રાસ્કલ જેવા અપશબ્દો કહેતાં વિવાદ સર્જાયો હતો. આ અંગેનો વિવાદ હાલ અમદાવાદ મ્યુનિસિપલ કોર્પોરેશન અને ભાજપ શાસકો વચ્ચે જોવા મળી રહ્યો છે.

કમિશનર અને વેજલપુર ભાજપના કોર્પોરેટર દિલીપ બગડીયા વચ્ચે આ બોલાચાલી થઈ હતી. બોલાચાલી બાદ કમિશનર સહિતના અધિકારીઓ બેઠક છોડીને જતા રહ્યા હતા. મહત્વનું છે કે, આ પહેલા પણ યોજાયેલી બેઠકોમાં ઉગ્ર ચર્ચા થઈ ચૂંકી છે. આ સમગ્ર મામલો અગ્રણી સુરેન્દ્ર પટેલ સુધી પહોંચ્યો હતો. આ પહેલા પણ CGROAD નવિનીકરણ અને જેટ પ્રોજેક્ટમાં પણ બંને પક્ષે વિખવાદ થયો હતો.કોર્પોરેટરો 2017થી રોડ ન બની રહ્યા હોવા અંગેની રજૂઆત કરી રહ્યાં હતા, અને જણાવ્યું કે 2017માં એવોર્ડ સમિતિમાં લખીને આપેલા રોડ છે તે હજી પણ બન્યા નથી.