અમદાવાદ: અમદાવાદ શહેરમાં અલગ અલગ જગ્યાઓ પર થઈ રહેલા મોબાઇલ ચોરીના બનાવો વધતા પોલીસે આરોપીઓની શોધખોળ હાથ ધરી હતી. જેમાં અમરાઈવાડી પોલીસને બાતમી મળી કે અમરાઈવાડીમાં મકાન ભાડે રાખી પાંચ આરોપીઓ વસવાટ કરે છે અને શંકાસ્પદ પ્રવૃત્તિ સાથે તેઓ જોડાયેલા છે. જેમના ઘરની તપાસ કરતા ઘરમાંથી 12 લાખથી વધુની કિંમતના 102 મોબાઈલ મળી આવ્યા જે તમામ ચોરીના હતા. જેથી પોલીસે મુદ્દામાલ કબજે કરી મહંમદ જહીરુદ્દીન શેખ, જીતેન્દ્ર સહાની. ટીંકુ ચૌધરી. અમિત ચૌધરી અને કરણ મોહતો નામના શખ્સોની ધરપકડ કરી છે.
મોબાઈલ ચોરી કરતી ટોળકી ઝડપાઈ: પોલીસે પાંચેય આરોપીની ધરપકડ કરી પૂછપરછ કરતા હકીકત સામે આવી કે આરોપીઓ ઝારખંડથી અમદાવાદ આવતા સમયે ટ્રેનમાં પણ મોબાઈલ ચોરી કરતા હતા. આ સિવાય બસ કે રીક્ષામાં પણ મુસાફરી કરતા લોકોના મોબાઈલની ચોરી કરતા હતા. ઉપરાંત કોઈપણ જગ્યાએ ભીડ ભેગી થઈ હોય તેવી જગ્યાએ જઈ મોબાઈલ ચોરીને અંજામ આપતા હતા. આરોપીઓએ અમદાવાદ ગાંધીનગર તથા આસપાસના અન્ય વિસ્તારમાંથી પણ મોબાઈલ ચોરીને અંજામ આપ્યો હતો. મહત્વનું છે કે આરોપીઓ ચોરીના તમામ મોબાઈલ બંગાળ ખાતે વેચાણ કરતા હતા અને ત્યારબાદ અન્ય આરોપીઓ મોબાઈલનો નિકાલ કરતા હોવાનું સામે આવ્યું છે.
'આરોપીઓ કેટલા સમયથી અહીંયા રોકાયા હતા અને આ આરોપીઓ સિવાય અન્ય કોઈ આરોપી આ ગેંગમાં સામેલ છે કે કેમ તે દિશામાં તપાસ હાથ ધરાઈ છે.' -ઇન્ચાર્જ સફિન હસન, DCP, અમદાવાદ ઝોન 5
સાત જ દિવસમાં 102 મોબાઈલ ચોર્યા: પોલીસની પ્રાથમિક પૂછપરછમાં હકીકત સામે આવી કે આરોપીઓ માત્ર સાત જ દિવસમાં 102 મોબાઈલ ચોર્યા હતા. સાથે જ એક મોંઘી દાટ ચોરીની સાયકલ પણ પોલીસે કબ્જે કરી છે. જે ચોરી કરી હતી. મહત્વનું છે કે 12 લાખથી વધુના મોબાઇલ આરોપીઓ માત્ર 6-7 લાખમા બંગાળમાં વેંચી દેવાના હતા. જોકે તે પહેલા પોલીસે આરોપી ઝડપી લીધા છે. સાથે જ જે લોકોના મોબાઈલ ચોરી થયા છે તેમણે પોલીસનો સંપર્ક કરવા અપીલ કરી છે.
આ પણ વાંચો Kutch Crime : BSFએ જખૌના કિનારેથી ચરસનું પેકેટ કબ્જે કર્યું, સતત આટલા દિવસથી મળી રહ્યું છે ચરસ
