અમદાવાદમાં પતંગ મહોત્સવ-2020માં 43 દેશોના પતંગબાજો ભાગ લેશે

અમદાવાદ: 31મા આંતરરાષ્ટ્રીય પતંગ મહોત્સવ-2020નું ઉદ્ધાટન રાજ્યના રાજ્યપાલ દેવવ્રત આચાર્યના હસ્તે કરવામાં આવશે. તેમની સાથે મુખ્યપ્રધાન વિજય રૂપાણી અને નાયબ મુખ્યપ્રધાન નિતીન પટેલ પણ ઉપસ્થિત રહેશે. આ સાથે રાજ્યના પ્રવાસન અને મત્સ્ય ઉદ્યોગ પ્રધાન જવાહર ચાવડા તેમજ પ્રવાસન રાજ્ય પ્રધાન વાસણભાઈ આહિર પણ હાજર રહેશે.

7થી 14 જાન્યુઆરી 2020 દરમિયાન અમદાવાદના રિવરફ્રન્ટ ગ્રાઉન્ડ, વલ્લભસદન ખાતે યોજાનારા આંતરરાષ્ટ્રીય પતંગ મહોત્સવમાં 43 દેશના 153 પતંગબાજો અને ભારતના 12 રાજ્યના 115 પતંગબાજો ભાગ લેશે. આ સાથે જ અનેક સાંસ્કૃતિક કાર્યક્રમોનું પણ આયોજન કરવામાં આવશે.

સવારે 10થી સાંજે 4 વાગ્યા સુધી પતંગ ઉડાડવામાં આવશે. આર્જેન્ટિના, ઓસ્ટ્રેલિયા, બ્રાઝિલ, કંબોડિયા અને કેનેડા જેવા દેશોમાંથી પતંગબાજો આ સ્પર્ધામાં ભાગ લેશે. જ્યારે ભારતના બિહાર, દિલ્હી, કર્ણાટક, કેરળ, મહારાષ્ટ્ર અને પંજાબ રાજ્યમાંથી લોકો આ સ્પર્ધામાં ભાગ લેશે. ગુજરાતની વાત કરવામાં આવે તો અમદાવાદ, વડોદરા, સુરત, રાજકોટ, ભુજ અને માંડવી જેવા શહેરોમાંથી પતંગબાજો અહીં આવશે.