પાણી પહેલાં પાળઃ મધ્યઝોનના પાલડી-ધરણીધરમાં જાહેર માર્ગો સેનેટાઈઝ કરવાનું શરૂં

અમદાવાદમાં કોરોનાના નવા 50 કેસ આવ્યાં છે, જેથી અમદાવાદ મ્યુનિસિપલ કોર્પોરેશન વધારે સતર્ક થયું છે. અમદાવાદ સિટીના મધ્ય ઝોન પર ધ્યાન આપતાં તંત્રે ફ્યૂમિગેશન શરુ કર્યું હતું. કોરોના વાયરસનો ચેપ અમદાવાદના પશ્ચિમ વિસ્તારમાં ન ફેલાય તે માટે દવાનો છંટકાવ ચાલુ કર્યો છે.

અમદાવાદઃ અમદાવાદમાં કોરોનાના નવા 50 કેસ મળીને આજે કુલ 133 કેસ નોંધાયાં છે. જેને પગલે અમદાવાદ મ્યુનિસિપલ કોર્પોરેશનનું તંત્ર વધુ સજાગ બન્યું છે. રાતોરાત એક્શન પ્લાન ઘડાયો છે. અમદાવાદ સિટી વિસ્તારનો કોરોના વાયરસનો ચેપ અમદાવાદ શહેરની બહારના વિસ્તારોમાં ન ફેલાય તે માટે સેનેટાઈઝરવાળા પાણીનો છંટકાવ શરૂ કરી દીધો છે.

અમદાવાદ મ્યુનિસિપલ કોર્પોરેશનની ફાયર બ્રિગેડની ગાડીનો ઉપયોગ દવાના છંટકાવ માટે શરૂ કરી દેવાયો છે. કોર્પોરેશન પાસે દવા છાંટવાની 39 ગાડીઓ છે, અને બીજુ સ્વાધ્યાય પરિવાર દ્વારા અપાયેલ દવા છાંટવાના પાંચ મશીન છે, જેના દ્વારા આજે દવાનો છંટકાવ શરૂ કરી દીધો છે. અમદાવાદના પાલડી-ભઠ્ઠા- ધરણીધર વિસ્તારની સોસાયટીઓમાં આજે વહેલી સવારથી દવાનો છંટકાવ કરાઈ રહ્યો છે. અને સોસાયટીઓને સેનેટાઈઝ કરાઈ રહી છે.