મહાશિવરાત્રીના પાવન અવસરે સોમવારે અમદાવાદના જાસપુર ખાતે વિશ્વના સૌથી મોટા ઉમિયા માતાજી મંદિરનું PM મોદીના હસ્તે ભૂમિપૂજન કરવામાં આવનાર છે. જેમાં રાજ્ય અને વિશ્વભરનાં 5 લાખથી પણ વધુ પાટીદારો ઉમટશે. પાટીદારોની સંસ્થા ‘વિશ્વ ઉમિયા ફાઉન્ડેશન’ અમદાવાદ દ્વારા 100 વિઘાની જમીન પર 1,000 કરોડના ખર્ચે આ વિશ્વ ઉમિયાધામ મંદિર સંકુલનું નિર્માણ થવાનું છે. જેના ભાગ રૂપે આ મહાભૂમિપૂજનનું આયોજન કરાયું છે. જેમાં 11,000થી વધુ પાટાલાઓ પર ઉમિયા માતાજી મંદિરની ભૂમિપૂજન કરી વિશ્વ રેકોર્ડનું સર્જન કરવામાં આવશે.
આ કાર્યક્રમના આયોજનમાં સહકાર આપવા 20,000 જેટલા સ્વયંસ્વેવકો છે. જેમાં 5000 બહેનો છે. જેમાં 5 લાખથી વધારે ભાવિકો ભોજનનો લાભ લેશે. આ કાર્યક્રમના સ્વયંસેવકોમાં IAS, IPS અને MLA સ્વયંસેવકો સેવા આપશે. જેમાં 2 IG, 2 કલેક્ટર, 2 ધારાસભ્યો અને 15થી વધારે પૂર્વ DYSP સેવા આપશે. રાજ્યના 7થી વધુ જિલ્લાઓમાં પાટીદાર સહિત તમામ સમાજના 20,000 લોકો સેવા આપશે. આ ભૂમિપૂજનના કાર્યક્રમમાં પાટીદાર સમાજ સિવાયના કેટલાક અન્ય સમાજની બહેનો પણ સેવા આપશે.
વિશ્વના સૌથી મોટા ઉમિયા મંદિરના ભૂમિપૂજન કાર્યક્રમની આંકડાકીય માહિતી આ મુજબ છે.
- 650 વિઘાની જમીન પર ઉમિયાનગરનું નિર્માણ થશે
- 5 લાખથી વધુ પાટીદારો અને અન્ય સમાજના લોકો ભાગ લેશે
- 20,000 સ્વયંસેવકો ખડેપગે કાર્યક્રમમાં સેવા આપશે
- 5,000 માતાઓ 5 લાખ લોકોને પ્રસાદી ભોજન કરાવશે
- 4 લાખથી વધુ લોકોને આમંત્રણ પત્રિકા દ્વારા આમંત્રણ પાઠવ્યું છે
- 1200થી વધુ એસ.ટી. બસ તથા ખાનગી બસોમાંથી લોકો રાજ્યભરમાંથી આવશે
- અમદાવાદમાંથી 300 AMTS બસોમાં લોકો ઉમટશે
- 3.75 કિમી સ્ક્વૅર ફુટના વિસ્તારમાં સમગ્ર કાર્યક્રમનું આયોજન કરવામાં આવશે
- 400 વિઘાની જમીન પર 75000 કાર અને બસોનું પાર્કિંગ
- 2,000 બાળકો માતાજીની આરતી પર સાંસ્કૃતિ પર્ફોમન્સ કરશે
- 11,000 પાટલા પર બેસી 22 હજાર લોકો ભૂમિપૂજન કરશે
