અમદાવાદ ક્રાઇમ બ્રાન્ચ દ્વારા વિશાલ ગોસ્વામી, રિન્કુ ગોસ્વામી, અને અજય ગોસ્વામીને અમદાવાદ સેશન્સ કોર્ટના જજ એમ.કે. દવે સમક્ષ રજૂ કરવામાં આવ્યા હતા. જ્યાં અમદાવાદ ક્રાઇમ બ્રાન્ચ દ્વારા આરોપીઓના 30 દિવસના રિમાન્ડની માગ સામે કોર્ટે 8 દિવસના રિમાન્ડ મંજૂર કર્યા છે.
અમદાવાદ ક્રાઇમ બ્રાન્ચ દ્વારા સેશન્સ કોર્ટમાં રજૂઆત કરવામાં આવી હતી કે, આરોપીઓ વિરુદ્ધ ગંભીર પ્રકારના ગુના દાખલ છે અને જેલમાં હોવા છતાં તેમની પાસે મોબાઇલ કઈ રીતે આવ્યા અને જામીન પર બહાર તેમના સાગરીતો થકી વેપારીઓ પાસેથી કઈ રીતે ખંડણી માંગવાનો રેકેટ ચાલતો હતો, તે બાબતે તપાસ કરવા માટે 30 દિવસના રિમાન્ડની માગ કરાઇ હતી. વિશાલ ગોસ્વામી સહિત અન્ય આરોપીઓના વકીલ તરફે દલીલ કરવામાં આવી હતી કે, તેમનું એન્કાઉન્ટર કરી દેવામાં આવશે.
અમદાવાદ ક્રાઈમ બ્રાંચ દ્વારા વિશાલ ગોસ્વામી ગેંગના આરોપી સુરજ ગોસ્વામી, અનુરાગ ગોસ્વામી, જયપુરી ગોસ્વામી અને બીજેન્દ્ર ગોસ્વામી વિરૂદ્ધ કુલ 30 દિવસના રિમાન્ડની માંગણી કરી હતી. જો કે, કોર્ટે 10 દિવસના રિમાન્ડ મંજૂર કર્યા છે. તમામ આરોપીઓના 24મી જાન્યુઆરી સુધી રિમાન્ડ મંજૂર કરવામાં આવ્યા છે.
વિશાલ ગોસ્વામી ગેંગના કુલ 51 જેટલા આરોપીઓ સંડોવાયેલા છે, ત્યારે જે ચાર આરોપીઓ સામે ગુનો દાખલ કરવામાં આવ્યો છે. તેઓ સાબરમતી જેલમાં ગેરકાયદેસર રીતે ફોન મેળવી વેપારીઓ પાસેથી ખંડણી માંગતા હતા. એટલું જ નહીં કોર્ટમાં કેસ ચાલતો હોય ત્યારે સાક્ષીઓને ડરાવવા-ધમકાવવાનો પણ ગુનો દાખલ કરવામાં આવ્યો છે.
