અમદાવાદઃ અમદાવાદ શહેરના પશ્ચિમમાં વિસ્તારમાં આવેલા સિંધુભવન રોડ પરની સૌથી પ્રતિષ્ઠિત હોટલ તાજમાં જુગાર રમતા 10 જુગારીઓની ધરપકડ કરવામાં આવી છે. હોટલનો માલિક જ અન્ય આરોપીઓને બોલાવીને હોટલના રૂમમાં બેસીને જુગાર રમાડતો આવતો હોવાની ઘટના પ્રકાશમાં આવી છે. તાજ હોટેલ કોઈ સામાન્ય હોટેલ નથી. દરેકના ખિસ્સાને પરવડે એમ નથી. અહીં આવી પ્રવૃતિ માટે આવતી વ્યક્તિ પણ સામાન્ય તો નહીં જ હોય એવું ચોક્કસપણે કહી શકાય છે. અમદાવાદની PCB ટીમે સિંધુભવન રોડ ઉપર આવેલી તાજ હોટલમાં જુગારધામ ઝડપી પાડ્યું છે.
આ પણ વાંચોઃ Ahmedabad Crime : પ્રેમસબંધમાં ભાઈએ ભાઈનું અપહરણ કરીને રાજસ્થાનમાં ઢોર માર માર્યો
કોણ છે માલિકઃ તાજ હોટલનો માલિક કૈલાશ ગોયેન્કા પોતાની હોટલમાં સાતમા માળે રૂમ નંબર 721 માં પોતે મિત્રો સાથે જુગાર રમાડતો હોવાની ચોક્કસ બાતમીના પોલીસને મળી હતી. પોલીસે દરોડા પાડીને આ સમગ્ર મામલે શંકર પટેલ, હસમુખ પરીખ, અજીત શાહ, કનુ પટેલ, ભાવિન પરીખ, પ્રદીપ પટેલ, ભરત પટેલ, જગદીશ દેસાઈ અને નરેન્દ્ર પટેલ એમ કુલ 10 લોકોની ધરપકડ કરી છે. પોલીસે દરોડા પાડીને પાના, કોઈન્સ રોકડ, મોબાઈલ ફોન સહિત 10 લાખ રૂપિયાથી વધારેનો મુદ્દામાલ જપ્ત કરી લીધો છે. પોલીસ તપાસમાંથી જાણવા મળ્યું છે કે, છેલ્લા એક અઠવાડિયથી અહીં પત્તાપ્રેમીઓ નસીબના ખેલ રમવા માટે આવતા હતા. જાણવા મળ્યું છે કે, કૈલાશ ગોયેન્કા સંકલ્પગ્રૂપના માલિક છે. જ્યારે એમની સામે પત્તા રમતા અન્ય ત્રણ મોટા વેપારીઓ છે.
ગૃહપ્રધાનનો કોલ આવશેઃ હોટેલના માલિકે ગૃહમંત્રીનો હમણા દસ મિનિટમાં કોલ આવશે અને તું કંઈ નહીં કરી શકે એવું કહીને કેસને દબાવવા માટે પ્રયાસ કર્યો હતો. પરંતુ કોઈ પ્રકારનો કોઈનો ફોન ન આવતા પોલીસે કાયેદસરની કાર્યવાહી કરી છે. તાજ સ્કાયલાઈનનો માલિક જે રૂમમાં બેસીને પત્તા રમાડતો હતો તે રૂમ અન્ય કોઈને આપવામાં આવતો ન હતો. છેલ્લા છ મહિનાથી આ રૂમનું બુકિંગ કોઈને અપાયું નથી. અમદાવાદમાં આવતા મોટાભાગના સેલિબ્રિટી અહીં રોકાણ કરે છે. જ્યારે આવા કોઈ સેલિબ્રિટી આવે તો જુગાર રમવાનું બંધ કરી દેવામાં આવતું.
આ પણ વાંચોઃ Ahmedabad News : મહાઠગ કિરણ પટેલ ક્રાઈમ બ્રાન્ચમાં સકંજામાં
રાત્રે દરોડા પાડ્યાઃ રાત્રીના 11 વાગ્યા આસપાસ પોલીસે હોટેલમાં દરોડા પાડ્યા હતા. જ્યારે રૂમનો દરવાજો ખખડાવ્યો એ સમયે કૈલાશે જ એ દરવાજો ખોલ્યો હતો. જ્યારે પોલીસ અંદર રૂમમાં ઘુસી ગઈ ત્યારે કુલ 9 વ્યક્તિઓ અંદર બેઠા હતા. તાજમાંથી આ પ્રકારની પ્રવૃતિ સામે આવતા હોટેલની પ્રતિષ્ઠાને પણ ડાઘ લાગ્યો છે. 10 લાખ રૂપિયાથી વધારેનો મુદ્દામાલ હોવાનું પોલીસ તપાસમાંથી જાણવા મળે છે.
આરોપીઓઃ કૈલાશ ગોએન્કા, ભરત પટેલ, હસમુખ પરીખ, શંકર પટેલ, ભાવિન પરીખ, જગદીશ દેસાઈ, કનું પટેલ, અજીત શાહ, પ્રદીપ પટેલ, નરેન્દ્ર પટેલ. પોલીસ તપાસમાંથી સામે આવ્યું હતું કે, હોટેલનો માલિક પોતાના ફાયદા માટે આ ગેમ રમાડતો હતો. સરખેજ પોલીસ સ્ટેશનમાં ગુનો નોંધીને હાલ આ તમામને જામીન પર છોડવામાં આવ્યા છે.
