અમદાવાદ : શહેરના નવા નરોડા વિસ્તારમાં 9 વર્ષના બાળક સાથે સૃષ્ટિ વિરુદ્ધનું કૃત્ય કરવામાં આવ્યું હોવાની ઘટના સામે આવી છે. બાળકને લલચાવી તેની સાથે દુષ્કૃત્ય કરવામાં આવ્યું હોવાની હકીકત સામે આવી છે. જોકે પરિવારને જાણ થતાં કૃષ્ણનગર પોલીસ મથકમાં ફરિયાદ નોંધાવી હતી, જેના આધારે પોલીસે આરોપોની ધરપકડ કરી છે.
શું છે સમગ્ર મામલો : અમદાવાદના નવા નરોડા વિસ્તારમાં રહેતા એક નરાધમે તેની જ સોસાયટીમાં રહેતા એક બાળકને પોતાની હવસનો શિકાર બનાવ્યો છે. શહેરના કૃષ્ણનગર પોલીસ મથક વિસ્તારમાં આવતા નવા નરોડામાં આવેલી એક સોસાયટીમાં રહેતા એક પરિવારે પોતાના 9 વર્ષના બાળક સાથે સૃષ્ટિ વિરુદ્ધનું કૃત્ય થયું હોવાની ફરિયાદ નોંધાવી હતી. ફરિયાદને આધારે પોલીસે ફરિયાદીની જ સોસાયટીમાં રહેતા યોગેશ ઉર્ફે યોગો સોલંકી નામના આરોપીની ધરપકડ કરી છે.
આ અંગે પોલીસે ફરિયાદને આધારે આરોપી યોગેશ ઉર્ફે યોગો સોલંકીની ધરપકડ કરી આગળની કાર્યવાહી હાથ ધરી છે. મેડિકલ ટેસ્ટ સહિતની કામગીરી કરીને આરોપીની વધુ તપાસ ચાલુ છે. - એ.જે. ચૌહાણ (PI , કૃષ્ણનગર પોલીસ સ્ટેશન)
લાલચ આપી બાળકને લઈ ગયો : આરોપી યોગેશ સોલંકીની પૂછપરછ કરતાં સામે આવ્યું હતું કે, સોમવારે સવારે જ્યારે બાળક તેના ઘરેથી રમવા બહાર નીકળ્યો હતો, ત્યારે આરોપી યોગેશે બાળકને તેના અન્ય મિત્રો મારા ઘરે રમે છે અને તેને ચોકલેટ આપું તેવી લાલચ આપી બાળકને ધાબા પર લઈ ગયો હતો અને ત્યાં બાળક સાથે સૃષ્ટી વિરુદ્ધનું કૃત્ય આચર્યું હતું. જોકે સમગ્ર મામલે પરિવારને ખ્યાલ આવતા આરોપી યોગેશ વિરુદ્ધ ફરિયાદ નોંધાવી હતી.
