શહેરના થલતેજ વિસ્તારમાં રહેતા નીલમબેન પટેલે ત્રણ યુવકો સોલા વિરુદ્ધ પોલીસ સ્ટેશનમાં ફરિયાદ નોંધાવી છે. નીલમબેન નાનાભાઈ મનોજ અને ભત્રીજા જય પટેલ સાથે રહે છે. નીલમબેનના નાનાભાઈ મનોજને કોઈ કારણસર દેવુ થઈ જતાં ઘરે વ્યાજખોરો પૈસા માટે આવતા હતા .જેથી મનોજભાઈ ઘર છોડીને જતા રહ્યાં હતા. ત્યારે 31 જુલાઈએ નીલમબેન અને તેમનો ભત્રીજો જય ઘરે એકલા હાજર હતાં ત્યારે, વ્યાજખોરો પ્રકાશ,અજિત અને હિતેશ હથિયારો સાથે ઘરમાં ઘૂસી આવ્યા હતા અને ઘરમાં તોડફોડ શરૂ કરી દીધી હતી.
વ્યાજખોરોએ તોડફોડ કર્યા બાદ મનોજના દીકરાને ગાડીમાં સાથે લઈ ગયા હતા. ત્યાર બાદ તેને ગાડીમાં હથિયારો બતાવીને માર માર્યો હતો અને વિવિધ જગ્યાએ ફેરવ્યો હતો. બાદમાં જયને બોપલ બ્રિજ પાસે ઉતારીને નાસી ગયા હતા. આ અંગે નિલમબેને પોલીસને જાણ કરી હતી. સોલા પોલીસ સ્ટેશનમાં ત્રણ યુવકો વિરુદ્ધ અપહરણનો ગુનો નોંધાવ્યો હતો જે અંગે સોલા પોલીસે ગુનો નોંધીને આરોપીની શોધખોળ શરૂ કરી છે.
