હોવ : બોલરોના શાનદાર પ્રદર્શન બાદ ઓપનર સ્મૃતિ મંધાના, યાસ્તિકા ભાટિયા અને કેપ્ટન હરમનપ્રીતની અડધી સદીના કારણે ભારતીય મહિલા ક્રિકેટ ટીમે રવિવારે અહીં પ્રથમ મહિલા વનડે (First Womens ODI in England) માં ઈંગ્લેન્ડ (Indian women team beat England) ને હરાવ્યું હતું. ભારતીય મહિલા ટીમે (Indian Women Cricket Team) ઈંગ્લેન્ડને 1 1થી હરાવ્યું હતું. ઈંગ્લેન્ડના 227 રનના ટાર્ગેટનો પીછો કરતા ભારતની સ્મૃતિએ 99 બોલમાં 91 રન બનાવ્યા હતાં. જેમાં 10 ચોગ્ગા અને 1 છગ્ગાનો સમાવેશ થાય છે. જ્યારે હરમનપ્રીતે 94 બોલમાં અણનમ 74 રન બનાવ્યા હતા. જેમાં 7 ચોગ્ગા અને 1 છગ્ગાનો સમાવેશ થાય છે. વિકેટકીપર બેટ્સમેન યાસ્તિકા ભાટિયાએ 47 બોલમાં 50 રન બનાવ્યા હતા. જેમાં 8 ચોગ્ગા અને 1 છગ્ગોનો સમાવેશ થાય છે.
ઈંગલેન્ડમાં મહિલા વનડે : ભારતે 34 બોલ બાકી હતા અને ત્રણ વિકેટે 232 રન બનાવીને સરળતાથી જીત મેળવી લીધી હતી. સ્મૃતિએ યાસ્તિકા સાથે બીજી વિકેટ માટે 96 અને કેપ્ટન હરમનપ્રીત સાથે ત્રીજી વિકેટ માટે 99 રનની ભાગીદારી કરી હતી, જેના કારણે ભારતને લક્ષ્ય હાંસલ કરવામાં વધારે મુશ્કેલી ન પડી. અગાઉ અનુભવી ઝડપી બોલર ઝુલન ગોસ્વામીએ તેની છેલ્લી આંતરરાષ્ટ્રીય સીરીજની પ્રથમ મેચમાં પ્રભાવિત કર્યા હતા. પરંતુ ઇંગ્લેન્ડની મહિલા ટીમ નીચલા મધ્યમ ક્રમના બેટ્સમેનોના સારા પ્રદર્શનને કારણે સાત વિકેટે 226 રન બનાવવામાં સફળ રહી હતી.
ઈંગ્લેન્ડ મહિલા ક્રિકેટ ટીમ : એલિસ ડેવિડસન રિચર્ડ્સે 61 બોલમાં 50 રન બનાવ્યા હતા. જ્યારે ડેની વોટે 50 બોલમાં 43 રન બનાવ્યા હતા અને સોફી એક્લેસ્ટોને 31 રન બનાવી ઈંગ્લેન્ડ માટે નોંધપાત્ર યોગદાન આપ્યું હતું. ચાર્લી ડીને છેલ્લે 21 બોલમાં 24 રન બનાવ્યા હતા.
આક્રમક અભિગમ : લક્ષ્યનો પીછો કરવા ઉતરેલી ભારતની શરૂઆત ખરાબ રહી હતી અને ટીમે બીજી ઓવરમાં શેફાલી વર્મા (01 રન)ની વિકેટ ગુમાવી હતી. શરૂઆતમાં વિકેટ ગુમાવવા છતાં સ્મૃતિ અને યસ્તિકાએ આક્રમક અભિગમ અપનાવ્યો હતો.
રનોની રફતાર : યાસ્તિકાએ આ વોંગ પર ચોગ્ગા સાથે ખાતું ખોલાવ્યું હતું, જ્યારે સ્મૃતિએ ક્રોસ પર સતત બે ચોગ્ગા ફટકાર્યા હતા. બંનેએ વોંગ પર વધુ બે ચોગ્ગા ફટકાર્યા હતા. સ્મૃતિએ ડેવિડસન રિચર્ડ્સને બે ચોગ્ગા સાથે આવકાર્યા હતા. જ્યારે યસ્તિકાએ તેમની બોલમાં સતત છગ્ગા અને ચોગ્ગા ફટકાર્યા હતાં. યાસ્તિકાએ ડીનની બોલ પર ચોગ્ગાની મદદથી માત્ર 45 બોલમાં તેની અડધી સદી પૂરી કરી હતી, પરંતુ આ ઓફ સ્પિનરે એક બોલ પછી બોલ્ડ કર્યો હતો. આ સમયે ટીમનો સ્કોર 17મી ઓવરમાં 99 રન હતો.
બેસ્ટ બોલીંગ : આ પહેલા ભારતની 39 વર્ષીય અનુભવી બોલર ઝુલને 10 ઓવરમાં માત્ર 20 રન આપીને એક વિકેટ લીધી હતી અને આ દરમિયાન 42 ડોટ બોલ ફેંક્યા હતા. તેની સાથે દીપ્તિ શર્માએ સારી રમત રમી અને 33 રનમાં બે વિકેટ લીધી. ભારતીય ટીમ થોડી નિરાશ થશે કારણ કે 34મી ઓવરમાં ઈંગ્લેન્ડનો સ્કોર છ વિકેટે 128 રન હતો, પરંતુ સાતમા, આઠમા અને નવમા નંબરના બેટ્સમેનોએ 100થી વધુ રન જોડી ટીમને પડકારજનક સ્કોર સુધી લઈ ગયા હતા.
