અહીં ઉલ્લેખનીય છે કે, મોહમ્મદ કૈફનો જન્મ ઉત્તર પ્રદેશના અલ્હાબાદ(પ્રયાગરાજ)માં 1 નવેમ્બર 1980ના રોજ થયો હતો. તેમણે તેમની જિંદગીના 18 વર્ષ આંતરરાષ્ટ્રીય ક્રિકેટને આપ્યા હતા. તેઓ પ્રથમ વખત ચર્ચામાં ત્યારે આવ્યા જ્યારે ભારતે તેમની કપ્તાની હેઠળ 2000માં અંડર 19 વર્લ્ડ કપ જીત્યો હતો.
મોહમ્મદ કૈફ ભૂતપૂર્વ દક્ષિણ આફ્રિકાના ક્રિકેટર જોન્ટી રોડ્સથી પ્રેરિત હતા, તેથી તે ટીમ ઈન્ડિયામાં ફીલ્ડિંગમાં સુધારો કરી શક્યા હતા. 20 વર્ષની ઉંમરે જ તેઓએ ભારતીય ટેસ્ટ ટીમમાં સ્થાન બનાવી લીધું હતુ. એટલું જ નહીં તેઓએ યુવરાજ સિંહ સાથે મળીને ફિલ્ડિંગમાં શાનદાર જોડી બનાવી હતી.
મોહમ્મદ કૈફના તે કેચને કોઈ ક્રિકેટ ફેન નહીં ભૂલી શકે, જ્યારે તેઓએ ભારતને પાકિસ્તાન સામેની મેચમાં 5 રને જીત અપાવી હતી. કરાંચીમાં રમાયેલી એ વન-ડે મેચને ભૂલવી અઘરી છે. એ મેચમાં ઈંજમામ ઉલ હકે સદી ફટકારી હતી, પરંતુ દ્રવિડ સદી ફટકારવામાં થોડા માટે રહી ગયા હતા. તો પણ કૈફે એક કેચની મદદથી ભારતને જીત અપાવી હતી.
કૈફે તે કેચ એવા સમયે કર્યો હતો, એ વાતનો અંદાજો તમે એ પરથી લગાવી શકો છો કે, ટીમ ઈન્ડિયા દ્વારા બનાવાયેલા 349 રનના વિશાળ સ્કોરને પાકિસ્તાન પાર કરવા જઈ રહ્યું હતુ. પાકિસ્તાનને મેચ જીતવા માટે આઠ બોલ પર ફ્કત દસ રનની જરૂર હતી. શોએબ મલિક અને મોઈન ખાન ક્રિઝ પર હતા એવામાં કૈફે શોએબ મલિકનો અદ્ભુત કેચ પકડ્યો અને ભારતે 5 રને દિલધડક જીત મેળવી.
તેઓએ અત્યાર સુધીમાં 13 ટેસ્ટ મેચ રમી છે, જેમાં તેણે 32.84 ની સરેરાશથી કુલ 624 રન બનાવ્યા છે. જેમાં તેનો હાઈએસ્ટ સ્કોર 148 રન છે. તેણે દેશ માટે 125 વનડે મેચ રમી છે. જેમાં તેણે 32.01ની સરેરાશથી 2753 રન બનાવ્યા છે. આમાં તેનો હાઈએસ્ટ સ્કોર 111 રન હતો.
તો બીજી તરફ 75 ટી -20 મેચમાં તેણે 21.70ની સરેરાશથી કુલ 1237 રન બનાવ્યા છે, જેમાં તેનો હાઈએસ્ટ સ્કોર 70 રન રહ્યો છે.
