મુંબઇ: કોરોના વાઇરસના કારણે લોકડાઉન વચ્ચે ટીવી ઉદ્યોગ પણ ઠપ્પ થઇ ગયો છે. આવી સ્થિતિમાં, ડાન્સના શોખીનો માટે સારા સમાચાર છે. એટલે કે સુપરહિટ રિયાલિટી શો ડાન્સ દિવાનાની ત્રીજી સીઝન જલ્દી જ આવવા તૈયાર છે.
ડાન્સ ક્વીન માધુરી દીક્ષિત પણ આ વખતે જજ તરીકે શોમાં જોડાશે. તેની સાથે શશાંક ખેતાન અને તુષાર કાલિયા પણ જોવા મળશે.
શૉ ની જજ માધુરી દીક્ષિત ટૂંક સમયમાં વર્ચુઅલ ઑડિશન્સ લેવાનું શરૂ કરશે. થોડા સમય પહેલા જ માધુરી દીક્ષિતે ડાન્સ દિવાને 3 નો પ્રોમો શૂટ કર્યો હતો જેમાં તે વાયકોમ 18ના ડિજિટલ પ્લેટફોર્મ પર ઑડિશન વીડિયો શેર કરવા સ્પર્ધકોને કહી રહી છે. ચેનલ આ વીડિયોઝને ટીવી પર પ્રસારિત કરશે.
આ વિશે માધુરીએ કહ્યું કે, આ સમયે દેશ ભયંકર પરિસ્થિતિમાંથી પસાર થઈ રહ્યો છે. આવી સ્થિતિમાં, ડાન્સ આ દેશના લાખો લોકોને તણાવથી દૂર રાખશે. ડાન્સ એ પણ તમારી લાગણીઓને વ્યક્ત કરવાનો એક માર્ગ છે. હું ખૂબ જ રોમાંચિત છું કે આ શોની નવી સીઝન સાથે આપણે આવા મુશ્કેલ સમયને પસાર કરીશું.
