અમદાવાદ ટ્રાન્સપોર્ટના ધંધાની આડમાં દારૂનો વેપલો કરતા 6 શખ્સો ઝડપાયા

અમદાવાદઃ ગુજરાત રાજ્યમાં દારૂબંધીનો કાયદો હોવા છતાં બુટલેગરો બેફામ-રીતે દારૂનો વેપલો કરી રહ્યા છે. વર્ષે દહાડે કરોડો અબજો રૂપિયાના દારૂની હેરોફેરી સમગ્ર રાજ્યમાં થઈ રહી છે. જેને ડામવા માટે ગત વર્ષે રાજ્ય સરકાર દારૂબંધીના કાયદાઓને વધુ કડક બનાવવામાં આવ્યા હતા અને તમામ એજન્સીઓને ગેરકાયદેસર પ્રવૃત્તિ કરતાં શખ્સો વિરૂધ્ધ સઘન કાર્યવાહી કરવાનો આદેશ આપવામાં આવ્યો હતો. જેના પગલે પોલીસ તંત્રએ કેટલાક બુટલેગરોને ઝડપીને લાખો રૂપિયાનો મુદ્દામાલ જપ્ત કર્યો છે.

પ્રાપ્ત માહિતી મુજબ બુટલેગરોને પોલીસનો કોઈ ખોફ રહ્યો ન હોય તે રીતે બુટલેગરો રાજસ્થાન, મધ્યપ્રદેશ તથા અન્ય સરહદોમાંથી રાજ્યની અંદર સુધી વિદેશી દારૂના મોટો જથ્થો ઘુસાડવામાં સફળ રહે છે. જો કે સ્થાનિક પોલીસ તથા અન્ય એજન્સીઓની સક્રિયતાને કારણે દારૂનો જથ્થો ગ્રાહકો સુધી પહોંચે તે પહેલાં જ ઝડપાઈ રહ્યો છે. આથી, કાર્યવાહી દરમિયાન નારોલ પોલીસે ગત સાંજે ટ્રાન્સપોર્ટના સામાનની આડમાં વિદેશી દારૂની હેરાફેરી કરવાના ષડયંત્રનો પર્દાફાશ થયો છે. પરપ્રાંતથી આવેલી એક ગાડીમાં દારૂનો મોટો જથ્થો હોવાની બાતમીને આધારે નારોલ પોલીસે વોચ ગોઠવીને વિદેશી દારૂનો જથ્થો મોકલનાર બુટલેગર સહિત સમગ્ર ષડયંત્રમાં સંડોવાયેલા 6 શખ્સોને ઝડપી લીધા છે.

શહેરના પ્રવેશ દ્વાર સમા ગણાતા નારોલ વિસ્તારમાં ટ્રાન્સપોર્ટનો ખુબ જ મોટો ધંધો ચાલી રહ્યો છે. બહાર ગામથી આવતી ટ્રકોની તપાસ દરમિયાન કેટલીક વાર પોલીસને વિદેશી દારૂનો મોટો જથ્થો, હથિયારો અને અન્ય નશીલા પદાર્થો મળી આવે છે. રાજ્ય વડાના આદેશ બાદ પોલીસ પરપ્રાંતથી આવતા તમામ વાહનોનું સઘન ચેકીંગ કરી રહ્યુ છે. આ ઉપરાંત રાઉન્ડ ધ ક્લોક પોલીસની ટીમો પણ પેટ્રોલીંગ કરી રહી છે.ગત સાંજે પોલીસની ટીમ આવી જ એક ટીમ પેટ્રોલિંગમાં હતી. તે દરમિયાન વિદેશી દારૂનો મોટો જથ્થો ભરીને રાજસ્થાનથી આઈશર ગાડી આવતી હોવાની બાતમી મળી હતી. જેને પગલે પેટ્રોલીંગ કરી રહેલ નારોલ પોલીસની ટીમ વોચમાં હતી. તે દરમિયાનમાં સાંજે સાત વાગ્યાના અરસામાં પોલીસને બાતમી મુજબની ગાડી નજરે આવતા પોલીસે તેને કોર્ડન કરી હતી અને તપાસ હાથ ધરતા ગણપતિ કાર્ગો મુવર્સના નામથી મોટા પ્રમાણમાં કંતાનના પાર્સલોમાં કાપડ તથા વાંસની ભારીઓ ભરેલી જોવા મળી હતી. જો કે સઘન તપાસમાં આ માલની નીચેથી કેટલાક બોક્ષ પણ મળી આવ્યા હતા.જેમાંથી રૂપિયા અઢી લાખથી વધુની કિંમતના વિદેશી દારૂની 500થી વધુ બોટલો મળી આવી હતી. જેના પગલે પોલીસે તુરંત ગણપતિ કાર્ગો મુવર્સના મેનેજર તથા આઈશર ગાડીના ચાલક, કિલનર અને અન્ય એક ટેમ્પોના ડ્રાઈવરને ગણતરીના સમયમાં જ ઝડપી લીધા હતા. અને તેમાંથી મુદ્દામાલ સ્વરૂપે રુપિયા 22.50 લાખનો વિદેશી દારુ સ્થાનીક પોલીસે કબ્જે કર્યો હતો. રાજસ્થાનથી આવેલી ગાડીઓમાં દારૂનો જથ્થો ભરી આવનાર વિષ્ણુદેવ પ્રજાપતિ તથા સુરેશ છનારામ વિરૂધ્ધ ફરીયાદ નોંધી અને બંન્નેને ઝડપી લેવા પોલીસે તપાસના ચક્રો ગતિમાન કર્યા છે.પ્રાથમિક તપાસમાં ગણેશ કાર્ગોના મેનેજર, ડ્રાઈવર તથા અન્ય શખ્સો ટ્રાન્સપોર્ટના સામાનની આડમાં વિદેશી દારૂનો જથ્થો મંગાવીને શહેરમાં વેંચાણ કરતાં હોવાનું જાણવા મળ્યુ છે. પોલીસે તમામ શખ્સોના રીમાન્ડ મેળવી આગળની વધુ તપાસ હાથ ધરી છે.