પાકિસ્તાનમાં એક સ્પેશિયલ અદાલતે પૂર્વ જનરલ પરવેઝ મુશર્રફ વિરૂદ્ધ ચાલી રહેલા રાષ્ટ્રદ્રોહના કેસમાં નિર્ણય સુરક્ષીત રાખ્યો છે. અદાલત આગામી 28 નવેમ્બરે આ મામલે પોતાનો નિર્ણય સંભળાવશે. પાકિસ્તાનની પીએમએલ-એન સરકારે 76 વર્ષિય પૂર્વ સેના પ્રમુખ વિરૂદ્ધ વર્ષ 2013માં આ કેસ નોંધ્યો હતો. મુશર્રફ પર નવેમ્બર 2007માં અતિરિક્ત બંધારણિય ઈમરજંસી લાગુ કરવાનો આરોપ છે. જો આ કેસમાં મુશર્રફ વિરુદ્વ ચુકાદો આવે તો તેમને ફાંસીની સજા થઇ શકે છે.
પાકિસ્તાનના ઈતિહાસમાં મુશર્રફ પહેલા સેના પ્રમુખ છે દેશદ્રોહનો ગુનો નોંધાયો હતો. 2016માં મુશર્રફ દુબઈ ભાગી ગયા ત્યારબાદ આ હાઇપ્રોફાઇલ મામલાની સુનાવણી ઠપ્પ થઇ ગઇ હતી. મુશર્રફે મેડિકલ ટ્રિટમેન્ટનો હવાલો આપીને માર્ચ 2016માં પાકિસ્તાન છોડી દીધું હતું. જોકે તેમણે પરત ફરવાની વાત પણ કહી હતી. સુપ્રીમ કોર્ટ દ્વારા તેમનું નામ એક્ઝિટ કન્ટ્રોલ લિસ્ટમાંથી હટાવ્યા બાદ તેઓ વિદેશ જઈ શક્યા હતાં. જોકે અમુક મહિના બાદ પાકિસ્તાનની એક વિશેષ કોર્ટે તેમને ભાગેડૂ જાહેર કર્યા હતા. જોકે અમુક મહિના બાદ કોર્ટે તેમને ભાગેડૂ જાહેર કર્યા હતા.
ત્યારબાદ મુશર્રફે સુરક્ષાના કારણોને લીધે સ્વદેશ પાછા ફરવાનો ઇનકાર કરી દીધો હતો. કોર્ટે ત્યારબાદ તેમની સંપત્તિ જપ્ત કરવાનો આદેશ આપ્યો હતો. તેમના વકીલે કોર્ટમાં જણાવ્યું કે પૂર્વ રાષ્ટ્રપતિ સુરક્ષાના કારણોના લીધે પાકિસ્તાનમાં આવીને કોર્ટમાં રજૂ નથી થઇ શકતા. વકીલે એ પણ કહ્યું કે તેમનું સ્વાસ્થ્ય ખરાબ રહે છે તેથી ડૉક્ટરે તેમને દુબઈથી બહાર જવાની મનાઇ કરી છે. 1999માં જનરલ મુશર્રફે વડાપ્રધાન નવાઝ શરીફની સરકારને બળજબરીપૂર્વક સત્તાથી હટાવી દીધી હતી. 2008 સુધી મુશર્રફે પાકિસ્તાન પર શાસન કર્યું અને ત્યારબાદ તેમને પદ છોડવા માટે મજબૂર થવું પડ્યું હતું.
