કોંગ્રેસની NRIને અપીલ, ગુજરાત આવી કોંગ્રેસને મત આપો

અમદાવાદઃ ગુજરાતના રાજકારણમાં પાટીદાર વોટબેંક સૌથી મોટી છે અને બંને પક્ષો પાટીદાર સમાજના વોટ કબજે કરવા જહેમત ઉઠાવી રહ્યા છે. પાટીદારોનો મોટો વર્ગ વિદેશોમાં પણ વસે છે, ત્યારે કોંગ્રેસે વિદેશમાં વસતા પાટીદાર સહિતના NRIને કોંગ્રેસને મત આપવા અપીલ કરી છે અને વિવિધ દેશોમાં વસતા ગુજરાતીઓને કોંગ્રેસે E-MAIL કરી ગુજરાતમાં આવી વોટ કરવા વિનંતી કરી છે.

કોંગ્રેસે વિદેશમાં ચાલતા રાજકીય અને સામાજિક સંગઠનોને અપીલ કરી છે કે, કોમવાદ અને ધાર્મિક લાગણી ઉશ્કેરી મત લેતી ભાજપને જાકારો આપવા અને લોકશાહીના મહાપર્વમાં મતદાન કરવા આવો.

કોંગ્રેસના મહામંત્રી હિમાંશુ પટેલે વિદેશમાં રહેતા ગુજરાતીઓને અપીલ કરતા જણાવ્યું હતું કે, વિદેશમાં રહેતા ગુજરાતીઓએ ગુજરાત પ્રેમ બતાવી મોટો ફાળો આપ્યો છે અને મતદાનના દિવસે મતદાન કરવા માટે અમે આખા અમેરિકામાં કોંગ્રેસના સંગઠન અને ગુજરાતીઓને સીધા ફોન, EMAIL અને સોશિયલ મીડિયા દ્વારા અપીલ કરી છે.