હેલ્મેટના દંડથી બચવા બાઇક ચાલકે ટ્રાફિક પોલીસ કર્મીને 25 ફુટ સુધી ઘસડ્યો

વડોદરાઃ એક નવેમ્બરથી લાગુ થયેલા ટ્રાફિકના નવા નિયમોનુ પાલન કરાવવા માટે પોલીસે કમરકસી છે, ત્યારે હેલ્મેટના કાયદાને લઇને વડોદરામાં ફરી એક વાર વિવાદ સર્જાયો છે. જેમાં હેલ્મેટ વિના બાઇક ચલાવી રહેલા શખ્સને ટ્રાફિક પોલીસે રોકતા એ ફફળી ઉઠ્યો હતો અને તેણે બાઇક વધુ ઝડપે ચલાવતા તેને ટ્રાફિક પોલીસે પાછળથી પકડ્યો હતો, ત્યારબાદ પણ ચાલકે બાઇક ચલાવવાનું ચાલુ રાખતા પોલીસ જવાન 25 ફુટ સુધી ઢસડાયો હતો. જોકે આ બનાવમાં ફરજ પરના ટ્રાફિક કર્મીને ઇજા પહોંચતા તેઓને તાત્કાલીક સારવાર અર્થે સયાજી હોસ્પિટલ ખાતે ખસેડવામાં આવ્યાં હતાં. સયાજીગંજ પોલીસે આ મામલે બાઇક ચાલક યુવકની ધરપકડ કરી કાયદેસરની કાર્યવાહી હાથ ધરી છે.

શહેર ટ્રાફિક પોલીસ તંત્ર દ્વારા ટ્રાફિકના નવા નિયમોનો કડક અમલ કરાવવા માટે શહેરના જંકશન પોઇન્ટો ઉપર પોલીસ કાફલો ઉતારી દેવામાં આવ્યો છે. પોલીસનો એક કાફલો ફતેગંજ નરહરી હોસ્પિટલ સર્કલ પાસે તૈનાત હતો. તે દરમિયાન એક મોટર સાઇકલ ચાલક હેલ્મેટ પહેર્યા વિના પસાર થતાં, ફરજ પરના ટ્રાફિક પોલીસ જવાન મુકેશભાઇ રાઠવાએ રોકવાનો પ્રયાસ કર્યો હતો.

નિયમનો ભંગ કરનાર બાઇક ચાલક દંડથી બચવા માટે પોલીસ જવાનને ચકમો આપીને ભાગી છૂટવાનો પ્રયાસ કર્યો હતો. પરંતુ, પોલીસ જવાન મુકેશ રાઠવાએ તેનો પીછો કરી પકડવાનો પ્રયાસ કરતા તેઓ બાઇક સાથે 25 ફૂટ સુધી ઘસડાયા હતાં. જેમાં તેઓને થાપામાં અને પગમાં ઇજા પહોંચી છે. ઇજાગ્રસ્ત પોલીસ જવાનને તુંરત જ સયાજી હોસ્પિટલ ખાતે ખસેડવામાં આવ્યો હતો. આ ઘટનાને લઇને સયાજીગંજ પોલીસે રિકીન સોનીની ધરપકડ કરી કાર્યવાહી હાથ ધરી છે. નોંધનીય છે કે, સોમવારે કાલાઘોડા ખાતે હેલ્મેટ બાબત પર જ તુષાર શાહ નામના વ્યક્તિએ ભારે હોબાળો મચાવ્યો હતો, ત્યારબાદ શહેરની આ બીજી વિવાદીત ઘટના સામે આવી છે.