રાઇટ ટુ એજ્યુકેશન એકટ હેઠળ પર્વત પાટિયા વિસ્તારમાં રહેતાં વાલીનું ફોર્મ શાળા દ્વારા રદ

રાજ્ય સરકારના રાઇટ ટુ એજ્યુકેશન એકટ હેઠળ પર્વત પાટીયા વિસ્તારમાં રહેતાં વાલીનું ફોર્મ શાળા દ્વારા રદ કરવામાં આવ્યું છે. સમય મર્યાદામાં આખરી તારીખે વાલી શાળાએ હાજર ન રહેતાં પ્રવેશ રદ કરવામાં આવ્યો હોવાનું કારણ શાળા સંચાલકોએ જણાવ્યું હતું. આ રજૂઆત લઈ વાલી જિલ્લા શિક્ષણ અધિકારી કચેરી પહોંચ્યાં હતાં. જ્યાં કચેરીએથી પણ નિરાશા હાથ લાગતાં વાલી મૂંઝવણમાં મૂકાયાં છે.

સુરત : શહેરના પર્વત પાટીયા વિસ્તારમાં રહેતાં વાલીએ ધોરણ એકમાં પોતાની બાળકીને પ્રવેશ અપાવવા આરટીઇ હેઠળ ફોર્મ ભર્યું હતું. જો કે માતાપિતા કોરોના સંક્રમિત થતાં બહારગામ ગયાં હતાં. જેના કારણે શાળાએ હાજર ન થઈ શકતા ફોર્મ રદ કરવામાં આવ્યું હતું.

રાઇટ ટુ એજ્યુકેશન એકટ હેઠળ પર્વત પાટિયા વિસ્તારમાં રહેતાં વાલીનું ફોર્મ શાળા દ્વારા રદ

પર્વત પાટિયા વિસ્તારમાં રહેતા જયદીપ પાડલીયાએ પોતાની છ વર્ષની દીકરીનું ધોરણ એકમાં પ્રવેશ મેળવવા માટે આરટીઇ હેઠળ ફોર્મ ભર્યું હતું. જે દરમિયાન તેમની બાળકીનો નંબર પર્વત પાટીયાની આરએમજી ઇંગ્લિશ મીડિયમ હાઈસ્કૂલમાં લાગ્યો હતો. અહીં આરટીઇ હેઠળ પ્રવેશ મેળવવા વાલીઓએ 20 મી સપ્ટેબરના રોજ ફરજિયાત રિપોર્ટિંગ માટે હાજર રહેવા માટેની સૂચના આપવામાં આવી હતી. જો કે જયદીપભાઈના માતાપિતા કોરોના સંક્રમિત થતાં તેઓએ સપરિવાર રાજકોટ જવાની ફરજ પડી હતી.

આ અંગે જયદીપભાઈએ જણાવ્યું હતું કે, આ બાબતની જાણ શાળાને ટેલિફોનિક માધ્યમ દ્વારા કરી દેવામાં આવી હતી.પરંતુ તેમ છતાં પ્રવેશ રદ કરી દેવામાં આવ્યો છે. શાળા દ્વારા સેકન્ડ રાઉન્ડમાં ફરીથી નામ ખુલશે તેવી બાંહેધરી આપી હતી. પરંતુ નામ ન ખુલતાં બાળકી ન પ્રવેશની ચિંતા સતાવી રહી છે. આ અંગે જિલ્લા શિક્ષણ અધિકારીને રજૂઆત કરવામાં આવી હતી. તેમ છતાં હવે પ્રવેશ નહી મળી શકે તેવી વાત જણાવવામાં આવી છે.