- વર્લ્ડ બેંક રૂપિયા 1400 કરોડની ગ્રાન્ટ આપવા તૈયાર
- સુરત મનપા અને વર્લ્ડ બેંક સંયુક્ત રીતે આ પ્રોજેક્ટ માટે ડીપીઆર પણ બનાવશે
- કુલ 66kmના વિસ્તારને રિવરફ્રન્ટ અને પિકનિક પોઇન્ટ તરીકે વિકસાવવાનો પ્રોજેક્ટ તૈયાર કરાયો
સુરત : તાપી રિવરફ્રન્ટ પ્રોજેક્ટ માટે વર્લ્ડ બેંક રૂપિયા 1400 કરોડની ગ્રાન્ટ આપવા તૈયાર થઈ છે. આ માટે આગામી દિવસોમાં સુરત મનપા કેન્દ્ર સરકારના પ્રતિનિધિઓ અને રાજ્ય સરકારના પ્રતિનિધિઓ સાથે વર્લ્ડ બેંકના અધિકારીઓ ઓનલાઇન મિટીંગ કરશે. મહત્વની બાબત એ છે કે, સુરત મનપા અને વર્લ્ડ બેંક સંયુક્ત રીતે આ પ્રોજેક્ટ માટે ડીપીઆર પણ બનાવશે. સુરત શહેર માટે અત્યંત મહત્ત્વનો એવો કન્વેન્શનલ બેરેજનો પ્રોજેક્ટ મંજૂર થવાની દિશામાં હવે નક્કર શરૂઆત થઇ ચૂકી છે.
આ પણ વાંચો- સાત વર્ષ બાદ તાપી નદી પર તૈયાર થયો આ બ્રિજ, CM રૂપાણી કરશે ઉદ્ઘાટન
તાપી નદી શહેરની વચ્ચેથી માંડીને ગાયપગલા સુધી છલોછલ ભરેલી દેખાશે
રૂઢ અને ભાટા વચ્ચે નદી પર 13 મીટરની હાઈટનો બેરેજ બન્યા બાદ તાપી નદી શહેરની વચ્ચેથી માંડીને ગાયપગલા સુધી છલોછલ ભરેલી દેખાશે. તેથી તાપી નદીના કિનારા પર બન્નેે બાજુ બે 33km મળીને કુલ 66kmના વિસ્તારને રિવરફ્રન્ટ અને પિકનિક પોઇન્ટ તરીકે વિકસાવવાનો પ્રોજેક્ટ તૈયાર કરાયો છે. જેના 3904 કરોડના અંદાજને સૈદ્ધાંતિક મંજૂરી પણ અપાઇ ચૂકી છે. સુરત માટે મહત્વકાંક્ષી એવા આ તાપી રિવરફ્રન્ટ પ્રોજેક્ટ માટે વિશ્વ બેંકે ફંડિંગ કરવા માટે બતાવેલી તૈયારીમાં વધુ એક કદમ આગળ વધાર્યું છે.
વિશ્વ બેંક 1400 કરોડ રૂપિયા આપશે
સુરત મ્યુનિસિપલ કમિશનર બંછાનિધિ પાનીએ જણાવ્યું હતું કે, વિશ્વ બેંકના પ્રતિનિધિઓ દ્વારા અગાઉ પ્રેઝન્ટેશન જોયા બાદ પ્રથમવાર ચર્ચા-વિચારણા માટે ઓનલાઇન મિટિંગ માટે તૈયારી બતાવી છે. આ પ્રોજેક્ટમાં પ્રથમ તબક્કામાં 200 કરોડ ખર્ચાશે. જેમાં વિશ્વ બેંક 1400 કરોડ રૂપિયા આપશે, જ્યારે રાજ્ય સરકાર અને મનપાના હિસ્સામાં 300-300 કરોડ આવશે. લોન લેવા માટે કેન્દ્ર સરકારની વિવિધ વિભાગોની સંમતિ હોવી જોઈએ. કેન્દ્રના ડિપાર્ટમેન્ટ ઓફ ઇકોનોમિક અફેર્સ સમક્ષ સંબંધિત તમામ વિભાગના અધિકારીઓની ઉપસ્થિતિમાં પ્રેઝન્ટેશન કરાયું હતું.
આ પણ વાંચો- રિવરફ્રન્ટ ખાતેથી ફરી વખત સાબરમતીમાં ક્રૂઝનો પ્રવાસ માણી શકાશે...
પ્રોજેક્ટને વર્લ્ડ બેંક લોન આપે એ માટે નીતિ આયોગે પણ મંજૂરી આપી દીધી
તેઓએ વધુમાં જણાવ્યું હતું કે, આ વિભાગ દ્વારા રિવરફ્રન્ટના પ્રથમ પેઝ એટલે કે રૂઢથી સિંગણપોર કોઝવે સુધીના 10 કિલોમીટર વિસ્તારમાં રિવરફ્રન્ટ માટે મંજૂરી આપવામાં આવી હતી. ત્યારબાદ આ પ્રોજેક્ટને વર્લ્ડ બેંક લોન આપે એ માટે નીતિ આયોગે પણ મંજૂરી આપી દીધી છે. જેમાં પ્રથમ ફેઝમાં આશરે 1991 કરોડનો પ્રોજેક્ટ થશે. જો કે, આ પ્રોજેક્ટ કેન્દ્ર અને રાજ્ય સરકારની મદદ તેમજ વર્લ્ડ બેંકની લોનથી સાકાર થશે તેમજ પબ્લિક પ્રાઇવેટ પાર્ટનરશિપ કરીને રોકાયેલા નાણા પરત મેળવવાનું આયોજન પણ છે.
