સુરત: પાંડેસરા વિસ્તારમાં વહેલી સવારે મનપા સફાઈ કર્મચારી પર મોટર સાઇકલ પર આવેલા બે અજાણ્યા શખ્સો દ્વારા જીવલેણ હુમલો કરવામાં આવ્યો હતો. હુમલાની ઘટના બાદ આરોપીઓ પોતાની મોટર સાયકલ અને ઘાતક હથિયાર મૂકી સ્થળ પરથી નાસી છૂટયા હતા.
પાંડેસરા સ્થિત 120 ફૂટ બમરોલી રોડ પર વહેલી સવારે સફાઈ કામકાજ કરી રહેલા પાલિકાના સફાઈ કર્મી પર જીવલેણ હુમલાની ઘટના બની હતી. ગવલેશ નંદકિશોર ભગત નામના સફાઈ કર્મી પાલિકા કચેરીમાં ફરજ બજાવે છે અને સોમવારે તે બમરોલી રોડ પર સફાઈ કરી રહ્યો હતો. જે વેળાએ મોટર સાયકલ પર આવી ચઢેલા 2 શખ્સોએ ઉપરાછાપરી છાતીના ભાગે ઘાતક હથિયાર વડે ઘા ઝીંકી ગંભીર ઇજા પોહચાડી હતી. પોતાને બચાવવા માટે લોકો પાસે ઇજાગ્રસ્ત યુવક મદદ માંગતો જોવા મળ્યો હતો, પરંતુ લોકો મદદ માટે આગળ આવવાને બદલે વીડિયો બનાવતા જોવા મળ્યા હતા.
સુરત મનપાના સફાઈ કર્મચારી પર જીવલેણ હુમલો
- આરોપીની માતાએ ભોગ બનનારા વિરુદ્ધ છેડતીની ફરિયાદ નોંધાવી હતી
- અંગત અદાવતને કારણે કરાયો હુમલો
- ભોગ બનનારાને મળી હતી ઘમકી
- પોલીસ આવ્યા પહેલાં થયો હુમલો
- લોકોએ ભોગ બનનારાને બચાવવાના બદલે બનાવ્યો વીડિયો
ઘટનાના પગલે આસપાસના વિસ્તારમાં નાસભાગ મચી હતી. જો કે, ગભરાયેલા શખ્સો પોતાની મોટર સાયકલ અને ઘાતક હથિયાર સ્થળ પર ફેંકી નાસી છૂટ્યા હતા. ઘટનાની જાણ થતાં સ્થળ પર પહોંચેલી પોલીસે ગંભીર રીતે ઈજાગ્રસ્ત સફાઈકર્મીને તાત્કાલિક સારવાર અર્થે સુરત નવી સિવિલ હોસ્પિટલ ખસેડી આગળની તપાસ શરૂ કરી હતી.
પોલીસે આસપાસમાં લાગેલા CCTV અને મોટર સાયકલના રજીસ્ટ્રેશનના આધારે આરોપીઓને શોધી કાઢવા કવાયત શરૂ કરી છે. જો કે, આ ઘટનામાં અંગત અદાવતમાં આ હુમલો કરાયો હોવાની માહિતી પણ સામે આવી રહી છે.
ઘટનાની તપાસ કરી રહેલી પોલીસને જાણવા મળ્યું કે, આ હુમલો ભોગ બનનારાની ચૌલમાં રહેતા નેહલ ઉર્ફે આકુ ચૌહાણ અને તેના મીત્ર સની ઉર્ફે સાહિલ દ્વારા કરાયો છે. જે અંગે ઊંડાણપૂર્વકની તપાસ પોલીસ દ્વારા શરૂ કરવામાં આવી હતી.
આ અંગે જોઈન્ટ પોલીસ કમિશ્નર એચ.આર.મૂલીયાનાએ જણાવ્યું હતું કે, લોકડાઉન દરમિયાન આરોપી નેહલની માતાએ ભોગ બનનારા ગવલેશ સામે છેડતીની ફરિયાદ નોંધાવી હતી. આટલું જ નહીં આરોપી અને ભોગ બનનારાએ એક-બીજા પર પોલીસમાં અરજીઓ પણ કરી હતી. જે અદાવત રાખી નેહલ અને તેના મીત્ર દ્વારા હુમલો કરાતાં તેમને ઝડપી પાડવા પોલીસની અલગ અલગ ટીમો હાલ કામે લાગી છે.
સૂત્રોના જણાવ્યા અનુસાર ભોગ બનનારાએ અગાઉ પોલીસને આ બાબતે કંટ્રોલ રૂમના નબંર પર કોલ કરી મદદ માગી હતી. જે અંગે પોલીસે બાદમાં સમાધાન કરાવી દીધું હતું. જો કે, સોમવારે પણ ભોગ બનનારાને ધમકી મળતાં પોલીસને ફોન કરી આ અંગેની હકીકત જણાવી હતી, પરંતુ પોલીસ આવ્યા પહેલાં તેના પર જીવલેણ હુમલો કરી દેવામાં આવ્યો હતો.
