- નાણાં પ્રધાન નિતિન પટેલને કરવામાં આવી રજૂઆત
- કોરોનાને કારણે GST પત્રકો ભરવામાં આવી રહી છે મુશ્કેલી
- લોકડાઉનને કારણે વેપાર-ધંધા પર પડી રહી છે અસર
સુરત: બારડોલીમાં GST પત્રકો ભરવાની મુદતમાં વધારો કરવાની માગ સાથે રાજ્યના નાણાં પ્રધાન નીતિન પટેલને લેખિતમાં રજૂઆત કરવામાં આવી છે. હાલ કોરોના સંક્રમણની સ્થિતિને કારણે અલગ-અલગ વિસ્તારોમાં સ્વૈચ્છીક લોકડાઉન હોવા ઉપરાંત કેટલાક વેપારીઓ અને ટેક્સ પ્રેક્ટિશનર પણ કોરોનાની ચપેટમાં આવી ગયા હોય હાલ પૂરતી મુદત લંબાવી આપવા માટે અનુરોધ કરવામાં આવ્યો છે.
આ પણ વાંચો: બારડોલીની ઉકા તરસાડીયા યુનિવર્સિટીમાં 154 બેડના કોવિડ કેર સેન્ટરનો થયો પ્રારંભ
GST રિટર્ન ભરવામાં આવી રહી છે મુશ્કેલી
સુરત જિલ્લા સહિત બારડોલીમાં પણ કોરોના વિકરાળ સ્વરૂપ ધારણ કરી રહ્યો છે. જેની અસર વેપાર-ધંધા પર પણ જોવા મળી રહી છે. બારડોલી વિસ્તારમાં ગઈ 13મી એપ્રિલથી 18મી એપ્રિલ સુધી સ્વૈચ્છીક લોકડાઉનને કારણે મોટા ભાગના વેપાર-ધંધા બંધ રહ્યા હતા અને આગામી 30મી એપ્રિલ સુધી વિકેન્ડ લોકડાઉન પણ લાગું કરવામાં આવ્યું છે. આ બધી સ્થિતિ વચ્ચે વેપારીઓની GST રિટર્ન ભરવા સહિતની પ્રક્રિયામાં મુશ્કેલી આવી રહી છે.
આ પણ વાંચો: બારડોલીમાં વહીવટી તંત્રએ બજારોમાં ચેકિંગ હાથ ધર્યું
ટેક્સ પ્રેક્ટિશનર પણ સંક્રમિત હોવાથી સમયસર પત્રકો ભરી શકાતા નથી
વેપારીઓ વતી બારડોલી પ્રદેશ ચેમ્બર ઓફ કોમર્સ એન્ડ ઈન્ડસ્ટ્રીઝ દ્વારા આ મામલે ગુજરાત રાજ્યના નાણાં પ્રધાન નિતિન પટેલને રજૂઆત કરવામાં આવી છે. જેમાં જણાવવામાં આવ્યું છે કે, બારડોલી પ્રદેશ વિસ્તારમાં ઘણા વેપારીઓ, એકાઉન્ટન્ટ અને ટેક્સ પ્રેક્ટિશનરો કોરોના પોઝિટિવ હોવાથી હોમ ક્વોરેન્ટાઇન છે અથવા તો હોસ્પિટલમાં દાખલ થઈ સારવાર લઈ રહ્યા છે. આવા સંજોગોમાં GST પત્રકો સમયસર ભરી શકાય તેમ નથી.
સ્થિતિ થાળે ન પડે ત્યાં સુધી મુદત લંબાવવા માગ
હાલની સ્થિતિને ધ્યાનમાં લઈ સરકાર દ્વારા GST પત્રકો 3બી અને GSTR-1 માર્ચ 2021થી લઈ પરિસ્થિતિ સામાન્ય ન થાય ત્યાં સુધી પત્રકો ભરવાની મુદ્દતમાં વધારો કરવામાં આવે તેમજ લેટ ફી (પેનલ્ટી)માં પણ રાહત આપવામાં આવે તેવી વિનંતી કરવામાં આવી છે.
