જિલ્લામાં સ્થાનિક ઇન્ચાર્જ તરીકે માનસિંહ પટેલ અને અર્જુન ચૌધરીને જવાબદારી સોંપાઈ
પ્રધાન કૌશિક પટેલ અને મજુરાના ધારાસભ્ય હર્ષ સંઘવીને પ્રદેશ કક્ષાએથી જિલ્લાની જવાબદારી અપાઈ
9 તાલુકા અને 4 શહેરી મંડળો મળી કુલ 13 મંડળોમાં ચૂંટણી ઇન્ચાર્જની નિમણૂક
બારડોલી : સ્થાનિક સ્વરાજની ચૂંટણી નજીક આવતા જ ભારતીય જનતા પાર્ટી દ્વારા જોરશોરથી તૈયારીનો પ્રારંભ કરી દેવામાં આવ્યો છે. ગુજરાત પ્રદેશ દ્વારા સુરત જિલ્લા સહિત 13 મંડળોના ચૂંટણી ઇન્ચાર્જની નિમણૂક કરવામાં આવી છે. જેમાં પ્રદેશ દ્વારા સુરત જિલ્લાના પ્રભારી મંત્રી અને રાજ્ય પ્રધાન કૌશિક પટેલ તેમજ મજુરાના ધારાસભ્ય હર્ષ સંઘવીની નિમણૂક કરવામાં આવી છે. જ્યારે જિલ્લા સંગઠન દ્વારા સમગ્ર જિલ્લાની જવાબદારી સુમુલડેરીના પ્રમુખ અને માજી સાંસદ માનસિંહ પટેલ તેમજ અર્જુન ચૌધરીને સોંપવામાં આવી છે.
ફેબ્રુઆરીમાં જાહેર થઈ શકે છે સ્થાનિક સ્વરાજની ચૂંટણી
આગામી ફેબ્રુઆરી માસમાં સ્થાનિક સ્વરાજની ચૂંટણીના ભણકારા વાગી રહ્યા છે. જિલ્લા પંચાયત, તાલુકા પંચાયત અને નગરપાલિકાની ચૂંટણીને લઈને રાજકીય પક્ષો દ્વારા તૈયારીઓ શરૂ કરી દેવામાં આવી છે. ભાજપ દ્વારા નવા સંગઠનની રચના બાદ મંડળોમાં પણ હોદ્દેદારોની નિમણૂક કરી છે.
અલગ અલગ મંડળોમાં બે બે ઇન્ચાર્જની નિમણૂક
બીજી તરફ ચૂંટણી જીતવા માટે જિલ્લા સહિત અલગ અલગ મંડળોમાં બે બે ઇન્ચાર્જની પણ નિમણૂક કરવામાં આવી છે. જેમાં અગાઉ પ્રદેશ દ્વારા જિલ્લાના ઇન્ચાર્જ તરીકે રાજ્યના મંત્રી કૌશિક પટેલ અને મજુરાના ધારાસભ્ય હર્ષ સંઘવીની નિમણૂક કરવામાં આવી હતી. બાદમાં જિલ્લા સંગઠન દ્વારા બે સ્થાનિકોની નિયુક્તિ કરવામાં આવી છે. જેમાં સમગ્ર જિલ્લાની જવાબદારી માજી સાંસદ અને સુમુલ ડેરીના પ્રમુખ માનસિંહ પટેલ તેમજ અર્જુન ચૌધરીને સોંપવામાં આવી છે.
એક બહારના અને એક સ્થાનિક નેતાની વરણી
બીજી તરફ વિવિધ તાલુકા અને શહેરના મંડળો માટેના ચૂંટણી ઇન્ચાર્જ તરીકે એક બહારના મંડળના નેતા અને એક સ્થાનિક નેતાની વરણી કરવામાં આવી છે. તાલુકા અને શહેર મળી કુલ 13 મંડળોમાં આ નિયુક્તિ કરી છે. જેઓ ચૂંટણી અંગેના આયોજનો ઉપરાંત ઉમેદવારોની પસંદગી અંગેની કાર્યવાહી કરશે.
તાલુકા મંડળોના ઇન્ચાર્જ
| તાલુકો | બાહ્ય મંડળના ઇન્ચાર્જ | સ્થાનિક મંડળના ઇન્ચાર્જ |
| ચોર્યાસી | ભરતસિંહ સોલંકી | છોટુ પટેલ |
| ઓલપાડ | બચુ રાઠોડ | કિરીટ પટેલ |
| પલસાણા | પ્રવીણ રાઠોડ | કેતન પટેલ |
| બારડોલી | અશ્વિન પટેલ | બાલુ પ્રજાપતિ |
| કામરેજ | જયેશ પટેલ | જગુ પટેલ |
| મહુવા | મહેશ વસાવા | હેમાંશુ પટેલ |
| માંગરોળ | પ્રવીણ પટેલ | અનિલ શાહ |
| ઉમરપાડા | હર્ષદ ચૌધરી | સામસિંગ વસાવા |
| માંડવી | કાંતિ પટેલ | રાજેન્દ્ર સોલંકી |
શહેરી મંડળના ઇન્ચાર્જ
| શહેર | બાહ્ય મંડળ ઇન્ચાર્જ | સ્થાનિક મંડળ ઇન્ચાર્જ |
| બારડોલી | તુષાર જે. પટેલ | હીરાચંદ શાહ |
| કડોદરા | જગદીશ પારેખ | હિતેશ દેસાઇ |
| તરસાડી | દિલીપસિંહ રાઠોડ | કાળુ ચોટલીયા |
| માંડવી | દિનેશ દેસાઇ | નલિન શાહ |
