બુલેટ ટ્રેન પ્રોજેક્ટ માટે જમીન સંપાદન પૂર્ણ, નવેમ્બરથી દર મહિને 50 પિલર ઉભા કરાશે: કેન્દ્રીય રેલવે પ્રધાન અશ્વિની વૈષ્ણવ

કેન્દ્રશાસિત પ્રદેશ દાદરા નગર હવેલીમાં 3 દિવસથી ચૂંટણી પ્રચારમાં આવેલા કેન્દ્રીય રેલવે પ્રધાન અશ્વિની વૈષ્ણવે રવિવારે એક પત્રકાર પરિષદમાં બુલેટ ટ્રેન પ્રોજેક્ટ પર વિશેષ વાતચીત કરી હતી. જેમાં કેન્દ્રીય રેલવે પ્રધાને જણાવ્યુ હતું કે, બુલેટ ટ્રેન પ્રોજેક્ટ ગુજરાતમાં પ્રગતિ પર છે. નવેમ્બર માસથી દર મહિને નવા 50 પિલર ઉભા થશે. આ રાષ્ટ્રનો મહત્વનો પ્રોજેક્ટ હોવાથી મહારાષ્ટ્ર સરકાર પણ આ પ્રોજેક્ટમાં સહકાર આપે.

• બુલેટ ટ્રેનનું કાર્ય પ્રગતિમાં
• 5 જેટલા પિલર તૈયાર થઈ ગયા
• જમીન સંપાદન કાર્ય પૂર્ણ થઈ ચૂક્યું

સેલવાસ: મુંબઈ-અમદાવાદ વચ્ચે ચાલી રહેલા બુલેટ ટ્રેન પ્રોજેક્ટ હેઠળ અત્યાર સુધીમાં 25 પિલર તૈયાર થઈ ગયા હોવાનું અને જમીન સંપાદન કામગીરી પૂર્ણ કરી ગુજરાતમાં કાર્ય પ્રગતિમાં હોવાનું રેલવે પ્રધાન અશ્વિની વૈષ્ણવે સેલવાસમાં યોજેલી પત્રકાર પરિષદમાં જણાવ્યું હતું. તેમણે વધુમાં ઉમેર્યું હતું કે, ગુજરાત-મહારાષ્ટ્રમાં આકાર પામનારા બુલેટ ટ્રેન પ્રોજેક્ટ માટે જમીન સંપાદનનું કામ પૂર્ણ થઈ ચૂક્યું છે.

દર મહિને 50 પિલર તૈયાર થશે

અશ્વિની વૈષ્ણવે કહ્યું હતું કે, આગામી નવેમ્બરથી દર મહિને 50 પિલર ઉભા કરવામાં આવશે. ગુજરાત સરકાર સાથે મહારાષ્ટ્ર સરકાર માટે પણ આ પ્રોજેકટ મહત્વનો પ્રોજેકટ છે. રાષ્ટ્રના આ પ્રોજેક્ટમાં મહારાષ્ટ્ર સરકાર પણ સંપૂર્ણ સહકાર આપે તેવી અપીલ રેલવે પ્રધાને કરી હતી.

જીઓ ટેક્નોલોજીથી સોઈલ ટેસ્ટીંગ કરાય છે

રેલવે પ્રધાનના જણાવ્યા મુજબ ગુજરાતમાં જમીન સંપાદન નું કાર્ય પૂરું થઈ ચૂક્યું છે. મહારાષ્ટ્રમાં તે માટે પ્રયાસો ચાલી રહ્યા છે. સોઈલ ટેસ્ટિંગ માટે અદ્યતન જીઓ ટેક્નોલોજીકલ લેબોરેટરી ઉભી કરવામાં આવી છે. જેનાથી આ પ્રોજેક્ટની ગુણવત્તામાં પણ ખૂબ જ ફાયદો થશે.

વાપી નજીક ડુંગરામાં બનશે બુલેટ ટ્રેન સ્ટેશન

ઉલ્લેખનીય છે કે, બુલેટ ટ્રેનનું એક સ્ટેશન વાપી અને દાદરા નગર હવેલીની વચ્ચે આવેલા ડુંગરા ગામે બનવાનું છે. જેનું નિર્માણ કાર્ય હાલ તેજ ગતિએ ચાલીએ રહ્યું છે. વાપીમાં બનનારા આ બુલેટ ટ્રેનનું સ્ટેશન અમદાવાદ બાદ સૌથી લાબું સ્ટેશન હશે.