ડીઝલના ભાવને લઈને Rajkot Transport Association એ ભાડામાં વધારો કર્યો

ડીઝલના ભાવ સતત વધવાના કારણે રાજકોટ ટ્રાન્સપોર્ટ એસોસિએેશન (Rajkot Transport Association) દ્વારા ભાડામાં વધારો કરવાનો નિર્ણય લેવામાં આવ્યો છે. રાજકોટમાં વધારેલા ભાડાં આગામી સોમવારથી લાગુ પડશે. આના કારણે માલસામાન મોંઘો બનશે અને મોંઘવારી વધુ વકરશે.

• રાજકોટ ટ્રાન્સપોર્ટ એસોસિએશને ભાડામાં વધારો કર્યો
• ડીઝલના ભાવો વધવાના કારણે લીધો નિર્ણય
• ભાડામાં 10થી 15 ટકાનો વધારો કર્યો

રાજકોટ: દેશમાં દિવસેને દિવસે પેટ્રોલ અને ડીઝલના ભાવ સતત વધી રહ્યા છે ત્યારે સામાન્ય જનતા પર વધુમાં વધુ મોંઘવારીનો બોજો પડી રહ્યો છે. આગામી દિવસોમાં ડીઝલના ભાવ વધવાના કારણે રાજકોટ ટ્રાન્સપોર્ટ એસોસિયેશન દ્વારા પણ ગાડીઓના ભાડામાં પણ 10થી 15 ટકાનો ભાવ વધારો કર્યો છે. જ્યારે હજુ પણ ડીઝલના ભાવ વધશે તો ટ્રાન્સપોર્ટ એસોસિએશન (Rajkot Transport Association)દ્વારા આગામી દિવસોમાં પણ ફરી આ ભાવ વધારો કરાય તેવી શક્યતાઓ જોવા મળી રહી છે. સતત ડીઝલના ભાવ વધવાના કારણે રાજકોટ ટ્રાન્સપોર્ટ એસોસિએેશન દ્વારા આ નિર્ણય લેવામાં આવ્યો છે. જે આગામી સોમવારથી રાજકોટમાં લાગુ પડશે. જ્યારે ટ્રાન્સપોર્ટેશન ખર્ચ વધશે તો તેની સાથે જોડાયેલી તમામ વસ્તુઓના ભાવમાં પણ વધારો થશે.

આવતા સોમવારથી ભાડામાં 10થી 15 ટકાનો વધારો

રાજકોટ ટ્રાન્સપોર્ટ એસોસિએશન (Rajkot Transport Association) દ્વારા તાજેતરમાં જ એક બેઠક યોજવામાં આવી હતી. જેમાં વધતાં ડીઝલના ભાવને લઇને ચર્ચા કરવામાં આવી હતી. જે દરમિયાન આગામી સોમવારથી ટ્રાન્સપોર્ટમાં ચાલતી ગાડીઓના ભાડામાં 10થી 15 ટકાનો વધારો કરવાની એસોસિએશન દ્વારા જાહેરાત કરવામાં આવી છે. જે આગામી સોમવારથી સમગ્ર રાજકોટમાં લાગુ પડી જશે. જ્યારે ટ્રાન્સપોર્ટેશન ભાડામાં 10 થી 15 ટકાનો ભાવ વધારો થશે ત્યારે ટ્રાન્સપોર્ટમાં આવતી જતી તમામ ચીજવસ્તુઓના ભાવ પણ તેની સીધી અસર જોવા મળશે એટલે કે આગામી દિવસોમાં જીવન જરૂરી વસ્તુઓના પણ ભાવ વધવાની શક્યતાઓ નકારી શકાતી નથી.

રાજકોટમાં અંદાજે 900 જેટલા ટ્રાન્સપોર્ટરો

રાજકોટમાં એક અંદાજે 900 જેટલા ટ્રાન્સપોર્ટરો છે. જેમાં નાના ટ્રાન્સપોર્ટરોની વાત કરવામાં આવી તો 300 જેટલા નાના ટ્રાન્સપોર્ટરો છે. જે છૂટક અને નાના નાના પરચુરણ બુકિંગના કામ સાથે જોડાયેલા છે. જ્યારે રાજકોટમાં નાના-મોટા મળીને 900 જેટલા ટ્રાન્સપોર્ટરો ચાલી રહ્યાં છે અને 25 હજાર કરતા વધુ લોકો જોડાયેલા છે. આ તમામ લોકોના ઘર ટ્રાન્સપોર્ટના વ્યવસાયના કારણે ચાલે છે. જ્યારે ડીઝલના ભાવ જેમ વધશે તેમ તેમ દર 15 દિવસે રાજકોટ ટ્રાન્સપોર્ટ એસોસિએશન (Rajkot Transport Association)દ્વારા રીવ્યૂ બેઠક યોજવામાં આવશે.

ભાડા વધારવા સિવાયનો વિકલ્પ નથી!

રાજકોટ ટ્રાન્સપોર્ટ એસોસિએશનના (Rajkot Transport Association)સભ્ય એવા બંસલ ગૌરવે ઈટીવી ભારત સાથેની વાતચીતમાં જણાવ્યું હતું કે જ્યારે સતત ડીઝલના ભાવ વધી રહ્યા છે ત્યારે અમને પણ હવે જુનું ભાડું પોસાય તેમ નથી. ત્યારે અમારી પાસે બીજો કોઈ વિકલ્પ નથી. જેને લઇને અમારે ટ્રાન્સપોર્ટેશનના ભાડામાં વધારો કરવો પડ્યો છે. જો હજુ પણ ડીઝલના ભાવ વધશે તો અમે 15 દિવસ બાદ ફરી રીવ્યુ બેઠક યોજીશું અને ટ્રાન્સપોર્ટેશનના ભાડામાં હજુ પણ વધારો કરશું. જો કેન્દ્ર સરકાર ટેક્સમાં થોડી રાહત કરીને ડીઝલ ભાવ ઘટાડે અથવા તેના ભાવને નિયંત્રણ કરી શકે તો તમામ ટ્રાન્સપોર્ટરોને તે પોષાય તેમ છે.

આ પણ વાંચોઃ પેટ્રોલ-ડીઝલના વધતા જતા ભાવને લઈને રાજ્ય કક્ષાના પેટ્રોકેમિકલ્સ વિભાગના પ્રધાને શું કહ્યું જાણો...

આ પણ વાંચોઃ ગુજરાતના આ શહેરમાં પ્રથમ વખત પેટ્રોલ-ડીઝલનો ભાવ રેકોર્ડબ્રેક, જાણો શું છે રેટ