રાજકોટના નવનિયુક્ત કોર્પોરેટરોએ આજીડેમમાં નર્મદા-નીરનાં કર્યા વધામણાં

રાજકોટની જીવાદોરી સમાન આજીડેમમાં આગામી એક માસ સુધી ચાલે એટલું જ પાણી હતું. ત્યારે રાજકોટ મહાનગરપાલિકા દ્વારા રાજ્ય સરકાર પાસે ફરી નર્મદાના પાણીની માંગણી કરવામાં આવી હતી. જેને લઇને તાજેતરમાં જ નર્મદાનીર આજીડેમ ખાતે છોડવામાં આવ્યા હતા.

• આજીડેમ ખાતે સમગ્ર કાર્યક્રમ યોજાયો
• મનપા દ્વારા રાજ્ય સરકારને કરાઈ હતી પાણીની માંગણી
• નવનિયુક્ત કોર્પોરેટરો સહિત અધિકારીઓ ઉપસ્થિત રહ્યા

રાજકોટઃ ગુરૂવારે નર્મદાનાં નીર આજીડેમમાં આવી પહોંચતાં રાજકોટના નવનિયુક્ત 68 જેટલા કોર્પોરેટરોએ આજીડેમના નવા નીરના વધામણા કર્યા હતા. રાજકોટના આજીડેમ ખાતે સમગ્ર કાર્યક્રમ યોજાયો હતો. ઉલ્લેખનીય છે કે, આજી ડેમમાં નર્મદાના નીર આવી પહોંચતા હવે આગામી દિવસોમાં રાજકોટવાસીઓને પાણીની સમસ્યા રહેશે નહિ.

સૌની યોજના હેઠળ નર્મદાનું નીર પહોંચ્યું રાજકોટ

રાજ્ય સરકાર દ્વારા સૌની યોજના હેઠળ નર્મદાનાં નીર સૌરાષ્ટ્રના અલગ અલગ ડેમોમાં પહોંચાડવામાં આવી રહ્યા છે. ત્યારે ઉનાળાની શરૂઆતમાં જ રાજકોટના જીવાદોરી સમાન એવા આજી ડેમમાં પાણી આગામી એક મહિનો સુધી ચાલે તેટલું જ હતું. જેને લઇને મનપા દ્વારા રાજ્ય સરકાર પાસે નર્મદાના નીરની માંગણી કરવામાં આવી હતી. જેને ધ્યાનમાં રાખીને સરકાર દ્વારા સૌની યોજના હેઠળ નર્મદાનાં નીર આજીડેમમાં પહોંચાડવામાં આવ્યું છે. જે આગામી દિવસોમાં સંપૂર્ણ ભરાઈ જશે અને આખો ઉનાળો ચાલે એમ છે. ત્યારે આજે મનપાના અધિકારીઓ દ્વારા નર્મદાના નીરને વધાવામાં આવ્યા હતા.

આ પણ વાંચો: ભાવનગરના શેત્રુંજી ડેમ માંથી 1100 હેકટર માટે પિયત નું પાણી છોડાયું

નવનિયુક્ત 68 કોર્પોરેટરોએ નીરના કર્યા વધામણાં

તાજેતરમાં જ યોજાયેલી રાજકોટ મહાનગરપાલિકાની ચૂંટણીમાં ભાજપના 68 જેટલા કોર્પોરેટરોનો વિજય થયો છે. ત્યારે આ તમામ ભાજપના 68 કોર્પોરેટરો રાજકોટના આજી ડેમ ખાતે ઉપસ્થિત રહ્યા હતા અને નર્મદાના નીરના વધામણા કર્યા હતા. તેમજ આગામી દિવસોમાં રાજકોટવાસીઓને પાણી સહિતની કોઈપણ સુવિધાઓનો અભાવ ન પડે તે માટે પણ તેઓ હંમેશા કાર્યરત રહેશે તેમ જણાવ્યું હતું. જો કે, સમગ્ર કાર્યક્રમ દરમિયાન રાજકોટ મનપાના નવનિયુક્ત કોર્પોરેટરો સહિત કોર્પોરેશનના અધિકારીઓ પણ ઉપસ્થિત રહ્યા હતા.