- જામનગરમાં વેક્સિનેશનના ચોથા તબકકાનો પ્રારંભ
- 18થી 44 વર્ષના લોકોને એપોઇન્મેન્ટ અનુસાર વેક્સિન આપવામાં આવી
- રાજ્યપ્રધાન ધર્મેન્દ્રસિંહ જાડેજાએ લીધી રસીકરણ કેંદ્રની મુલાકાત, રસી લેનાર નાગરિકોને બિરદાવ્યા
- જામનગરવાસીઓમાં વેક્સિન લેવા અનેરો ઉત્સાહ જોવા મળ્યો
જામનગરઃ જિલ્લામાં આજે શનિવારથી કોવિડ પ્રતિરોધક રસીકરણ અભિયાનના ચોથા તબકકાનો પ્રારંભ કરવામાં આવ્યો છે. આજે ગુજરાત રાજ્યના સ્થાપના દિવસ 1 મેથી રાજ્યના 10 જિલ્લાઓમાં 18 વર્ષથી વધુ વયના યુવાનોને રાજ્ય સરકાર વિનામૂલ્યે વેક્સિન આપવાનો પ્રારંભ થઇ ચૂકયો છે. જેમાં જામનગર જિલ્લાના નાગરિકોમાં વેક્સિન લેવા અનેરો ઉત્સાહ જોવા મળ્યો હતો.
રસી લેનાર નાગરિકોને બિરદાવ્યા
આ તકે અન્ન અને નાગરિક પુરવઠા રાજ્યપ્રધાન ધર્મેન્દ્રસિંહ જાડેજાએ જામનગર શહેરના વોર્ડ નંબર 6ના રસીકરણ કેન્દ્રની મુલાકાત લીધી હતી અને તમામ વ્યવસ્થાઓની સમીક્ષા કરી હતી. આ સમયે રાજ્ય પ્રધાને રસી લેનાર નાગરિકોને બિરદાવ્યા હતા.
આ પણ વાંચોઃ જામનગરમાં વેક્સિન રજિસ્ટ્રેશનમાં ધાંધિયા, લોકો આરોગ્ય કેન્દ્ર પર કરી રહ્યા છે રજૂઆત
વિનામૂલ્યે વેક્સિન આપવાનો પ્રારંભ
ઉલ્લેખનીય છે કે, ગુજરાતમાં 18 વર્ષથી વધુ વયના યુવાનો કોરોના સામે સુરક્ષિત રહે એ હેતુ જલદીમાં જલદી વેક્સિનેશન શરૂ થાય તે માટે રાજ્ય સરકાર પ્રયત્નશીલ છે. રાજયમાં જ્યાં કોરોનાનું સંક્રમણ વધારે છે એવા 10 જિલ્લાઓ- અમદાવાદ, સુરત, વડોદરા, રાજકોટ, ભાવનગર, જામનગર, કચ્છ, મહેસાણા, ભરૂચ અને ગાંધીનગરમાં આજે શનિવારથી, ગુજરાતના સ્થાપના દિવસે સવારે 9 કલાકથી 18 વર્ષથી વધુ વયના યુવાનોને રાજ્ય સરકાર વિનામૂલ્યે વેક્સિન આપવાનો પ્રારંભ થઇ ચૂક્યો છે.
લોકોમાં વેક્સિનને લઈ ઉત્સાહ
આજે શનિવારથી શરૂ થયેલા 18થી 44 વયજૂથના વેક્સિનેશનનો ચોથા તબક્કામાં જે યુવાનોએ cowin.gov.in પોર્ટલ પર ઓનલાઇન રજિસ્ટ્રેશન કરાવ્યું હશે તે પૈકીના આ 10 જિલ્લાના યુવાનોને SMS મળશે અને SMSમાં દર્શાવેલા સેન્ટર પર જઈને તેમણે વેક્સિન લેવાની રહેશે. ઓનલાઇન રજિસ્ટ્રેશન ફરજિયાત છે. સ્થળ પર રજિસ્ટ્રેશનની જોગવાઇ નથી. આ રસીકરણ અભિયાનમાં ડેપ્યુટી મેયર તપનભાઈ પરમાર, સ્ટેન્ડિંગ કમિટી ચેરમેન મનીષભાઈ કટારીયા, શહેર ભાજપ અધ્યક્ષ વિમલભાઈ કગથરા, શાસક પક્ષ નેતા કુસુમબેન પંડ્યા, દંડક કેતનભાઇ ગોસરાણી, મહામંત્રીઓ વિજયસિંહ જેઠવા, પ્રકાશભાઇ બાંભણીયા, મેરામણભાઇ ભાટુ, કોર્પોરેટર જશુબા ઝાલા, પૂર્વ કોર્પોરેટર કમલાસિંહ રાજપૂત, અનિરુધ્ધસિંહ ઝાલા વગેરે જોડાયા હતા.
