- મુખ્યપ્રધાનની વર્ચ્યુઅલ અધ્યક્ષતામાં યોજાયો કાર્યક્રમ
- જામનગરમાં 340મોં સાધન સહાય વિતરણ કાર્યક્રમ
- 220 મોટર ટ્રાઈસિકલ દિવ્યાંગજનોને અપાઈ
ગાંધીનગર: મુખ્યપ્રધાન વિજય રૂપાણી( CM Vijay Rupani ) એ જામનગર ખાતે કેન્દ્ર સરકારના સામાજિક ન્યાય અધિકારીતા મંત્રાલય આયોજિત દિવ્યાંગ સાધન સહાય વિતરણ (Equipment Distribution Program Jamnagar ) કાર્યક્રમને વર્ચ્યુઅલ માધ્યમથી સંબોધતા જણાવ્યું કે, દિવ્યાંગજનોની ચિંતા અને તેમના વિકાસનો સર્વગ્રાહી ભાવ સશક્ત સમાજનું કર્તવ્ય બને છે. તેમણે આ સંદર્ભમાં વધુમાં જણાવ્યું હતું કે, જે સમાજ દિવ્યાંગજનોની ચિંતા કરતો નથી તે સમાજ સ્વયં દિવ્યાંગ છે.
આ પણ વાંચો: અરવલ્લી જિલ્લામાં 22,034 મહિલાઓને ગંગાસ્વરૂપ વિધવા આર્થિક સહાય લાભ આપવામાં આવી
જામનગરમાં દિવ્યાંગો માટે 3 કરોડ 64 લાખની સાધન સહાય
જામનગરમાં 3,825 દિવ્યાંગજનોને 3 કરોડ 64 લાખ રૂપિયાના 6225 વિવિધ સાધન સહાયનું વિતરણ કરાયું હતું. જામનગરના સાંસદની ગ્રાન્ટમાંથી 26.40 લાખના ખર્ચે 220 મોટર ટ્રાઈસિકલ દિવ્યાંગજનોને આપવામાં આવી છે. આ બાબતે, મુખ્યપ્રધાન વિજય રૂપાણીએ જણાવ્યું હતું કે, ગુજરાતમાં પણ રાજ્ય સરકારે દિવ્યાંગજનોને શિક્ષણ, રોજગારી સહિતના ક્ષેત્રોમાં સહાયરૂપ થઈ સમાજમાં તેમના સન્માનભેર પુન:સ્થાપનની યોજનાના અસરકારક રીતે અમલી બનાવી છે. રાજ્ય સરકારે વર્ષ 2020માં 6 કરોડ 57 લાખ રૂપિયાના ખર્ચે 7,451 દિવ્યાંગ લાભાર્થીઓને વિવિધ સહાય પૂરી પાડી પગભર કર્યા છે.
દિવ્યાંગજનોની સુગમતા માટે હવાઈ મથકો, રેલવે સ્ટેશન પર કરાઈ વ્યવસ્થા
કેન્દ્રીય પ્રધાન થાવરચંદ ગેહલોતે જણાવ્યું કે, પહેલા 7 પ્રકારની દિવ્યાંગતાને આવરી લેવાઈ હતી અને વર્તમાન સરકારે વધારીને 21 પ્રકારની દિવ્યાંગતાને આવરી લીધી છે. આ ઉપરાંત, દિવ્યાંગજનોની સુગમતા માટે દેશના 35 આંતરરાષ્ટ્રીય હવાઈ મથકો, 55 ડોમેસ્ટિક હવાઇ મથકો 709 રેલવે સ્ટેશનો અને 10,175 બસ સ્ટેશનોને સુગમ્ય બનાવવામાં આવ્યા છે. કેન્દ્રીય પ્રધાને ઉમેર્યું કે, કેન્દ્ર સરકારે દિવ્યાંગોને વિદેશ અભ્યાસ સ્કોલરશીપ અન્વયે 2,800 ઉપરાંત છાત્રોને 8 કરોડથી વધુ શિષ્યવૃત્તિ આપી છે. ગુજરાતમાં સરકારી ભવનોમાં દિવ્યાંગોને અવરજવરની સરળતા માટે રેમ્પ જેવી સગવડો માટે 26 ભવનો માટે 1 કરોડ 14 લાખની રકમ ફાળવી છે.
આ પણ વાંચો: સુરત કોરોનામાં મુશ્કેલીમાં મુકાયેલા પરિવારના મદદે માટે અમેરિકાનો પરિવાર આવ્યો
દિવ્યાંગોને દેશભરમાં 58 લાખ UDID કાર્ડ આપવામાં આવ્યા
આ બાબતે ગેહલોતે જણાવ્યું કે, દિવ્યાંગોને દેશભરમાં 58 લાખ UDID કાર્ડ આપવામાં આવ્યા છે. જે હવે બધા રાજ્યો જિલ્લાઓમાં એક્સેસ થઈ શકશે. તેમણે એમ પણ કહ્યું કે, આવી સાધન સહાય વિતરણ શિબિરોથી દિવ્યાંગજનોના જીવનમાં ચેતનાનો નવો સંચાર થાય છે. આ અવસરે ભાજપાના પ્રદેશ અધ્યક્ષ સી આર પાટીલે જામનગર સંસદીય મત ક્ષેત્રમાં આવા કાર્યક્રમ યોજી 6000 જેટલા સાધનો 3,800 ઉપરાંત દિવ્યાંગોને કોવીડના પ્રોટોકોલ સાથે વિતરણ કરવા માટે સાંસદ પૂનમ માડમને અભિનંદન પાઠવ્યા હતા.
