જમીન માપણીમાં વધુ ફરિયાદોને લઈને કામગીરી ઓનલાઈન કરાઇ : મહેસૂલ પ્રધાન

રાજ્ય સરકાર દ્વારા હવે ઓનલાઈન ઉપર વધુ ભાર આપીને અનેક યોજનાઓ અને અનેક કાર્ય ઓનલાઇન શરૂ કર્યા છે. ત્યારે રાજ્ય સરકારે હવે જમીન માપણી પણ ઓનલાઇન કરવાનો મહત્વનો નિર્ણય કર્યો છે. આમ હવે મહેસૂલી સેવામાં વધુ એક જમીન માપણીની સેવા પણ ઓનલાઇન કરવામાં આવી છે. ઉલ્લેખનીય છે કે, જમીન માપણી બાબતે અનેક ફરિયાદો આવતી હોવાનું મહેસૂલપ્રધાન કૌશિક પટેલે કબૂલ્યું હતું.

ગાંધીનગર : જમીન માપણી વિવિધ સેવાઓ ઓનલાઇન કરતાં રાજ્યના મહેસૂલ કૌશિક પટેલે જણાવ્યું હતું કે, રાજ્યમાં ટેકનોલોજીના ઉપયોગ થકી પ્રજાને કર્મચારી સાથે સીધા સંપર્ક વિના સેવાઓ મેળવી શકે તે માટે મહેસૂલી સેવાઓને સરળ ઝડપી અને ઓનલાઈન કરવાની કવાયતને આગળ વધારવામાં આવી છે. ટૂંકાગાળામાં 21 જેટલી વિવિધ મહેસુલી સેવા ઓનલાઇન કરવામાં આવી છે. જે પૈકી મોટાભાગની સેવાઓનું ફેસ પદ્ધતિથી અમલીકરણ થઈ રહ્યું છે. ત્યારે આ પ્રકારની સેવાઓનો સીધો લાભ નાગરિકો મેળવી રહ્યાં છે. આવી જ વધુ એક સેવા જમીન માપણીની કામગીરીને ઓનલાઇન કરવાનો રાજ્ય સરકારે નિર્ણય કર્યો છે.

જમીન માપનીમાં વધુ ફરિયાદોને લઈને હવે કામગીરી ઓનલાઈન કરી : કૌશિક પટેલ

કૌશિક પટેલ જણાવ્યું હતું કે, જમીનોની માપણી માટે અગાઉ અરજદારોએ જિલ્લા જમીન દફતર નિરીક્ષક કચેરીમાં અરજી કરવાની રહેતી હતી તેમ જ માપણી ફી ચલણથી બેન્કમાં ભરી કચેરીમાં રજૂ કરવાની થતી હતી. હવે મહેસૂલ વિભાગના iORA પોર્ટલ પર જમીન માપણીની કામગીરી ઓનલાઇન કરવાથી અરજદારોને માપણી અરજી દુનિયાના કોઈપણ ખૂણેથી ઓનલાઇન કરી શકશે. તેમજ સિસ્ટમ દ્વારા જ માપણી ફીની ગણતરી થશે અને માપણી ફી ઓનલાઇન ભરી શકશે. જેથી અરજદારને કચેરીમાં જવામાંથી મુક્તિ મળશે. ઉપરાંત સરકારી રેકોર્ડ જેવા કે ગામ નમૂના સાત તથા 8-અ ઓનલાઇન મેળવી લેવામાં આવે છે આથી અરજદારોને ગામ નમુના તથા ૮-અ જમા કરવામાંથી પણ મુક્તિ મળશે.

જ્યારે જમીન બાબતે મળેલી અનેક ફરિયાદોને હવે ધ્યાનમાં લઇને કેટલી અને કયા પ્રકારની ફરિયાદ છે, તે તમામ પ્રકારના ડેટા કલેક્ટ કરવા પણ રાજ્યના મહેસૂલપ્રધાન કૌશિક પટેલ અધિકારીઓને સૂચના આપી છે. ત્યારે હવે ફરિયાદોને ધ્યાનમાં લઈને પણ આવનારા દિવસોમાં ઓનલાઇન વ્યવસ્થા સુધારવામાં આવશે.