પાટનગરમાં વાવાઝોડા સાથે વરસાદનું આગમન, વાતાવરણમાં ઠંડક પ્રસરી

રાજ્યમાં લૉકડાઉન બાદ આજે સોમવારથી મંદિરના કપાટ ખૂલ્યાં છે. ત્યારે પાટનગરમાં મેઘ સ્વરૂપે પ્રભુ અવતરણ થયું છે. વીજળીના કડાકાભડાકા સાથે ગાંધીનગરની સૂકાયેલી ધરતી ઉપર વરસાદનું આગમન થતાં નગરવાસીઓમાં ઠંડકની સાથે ખુશી જોવા મળી હતી.

ગાંધીનગરઃ રાજ્યમાં કાળઝાળ ગરમીમાં પશુ પંખી સહિત નાગરિકો ત્રાહિમામ પોકારી ગયાં હતાં. વાહનો મર્યાદિત માત્રામાં ફરતાં હોવાના કારણે પ્રદૂષણની અસર ઓછી જોવા મળતી હતી. પરંતુ ગરમીનો પારો સતત ઊંચે જવાના કારણે નાગરિકો બેબાકળાં બની ગયાં હતાં. નિસર્ગ વાવાઝોડાને લઈને રાજ્યમાં આગામી ત્રણ દિવસ વરસાદની આગાહી કરવામાં આવી છે, તેવા સમયે આજે પાટનગરમાં બપોર બાદ વાતાવરણમાં એકાએક પલટો જોવા મળ્યો હતો.

આકાશમાં ઘેરાઈને આવેલા કાળા ડિબાંગ વાદળો એકાએક પાટનગરની ધરતી ઉપર વરસી પડ્યાં હતાં. આકાશમાં વીજળીના કડાકાભડાકા સંભળાઈ રહ્યાં હતાં. પવન જોરજોરથી ફૂંકાયો હતો. ત્યારબાદ એકાએક મેઘરાજાએ ગાંધીનગરની ધરાને વરસાદથી ભીંજવી નાંખતી હતી. ગરમીથી અકળાઈ ગયેલા નાગરિકો પણ વરસાદનો આનંદ લેવા માટે બહાર નીકળેલા જોવા મળતાં હતાં.