કેમ્બે હોટલના કર્મચારીઓને છ મહિનાથી પગાર ન મળતાં ઘરના ચૂલા સળગાવવા મુશ્કેલ બન્યાં, હડતાળ પર ઉતર્યા

ગાંધીનગર શહેરના સેક્ટર-25 જીઆઇડીસી વિસ્તારમાં આવેલી કેમ્બે હોટલના કર્મચારીઓને છેલ્લા 6 મહિનાથી પગાર આપવામાં નહીં આવતાં હડતાળનું શસ્ત્ર ઉગામ્યું હતું. લૉકડાઉન પહેલાથી હોટેલના સંચાલકો દ્વારા કર્મચારીઓને પગાર મુદ્દે ટટળાવવામાં આવી રહ્યાં છે. જેને લઈને આજે 200 જેટલા કર્મચારીઓ હડતાળ ઉપર ઉતર્યા હતાં.

ગાંધીનગરઃ લૉકડાઉનના કારણે અનેક કર્મચારીઓની સ્થિતિ કફોડી બની ગઈ છે. સરકાર દ્વારા શરૂઆતમાં તમામ કર્મચારીઓને પગાર આપવાની વાત કરવામાં આવી હતી. સામાન્ય પગારમાં કામગીરી કરતા કર્મચારીઓને આ સમય દરમિયાન ઘરનો ચૂલો સળગાવવો પણ મુશ્કેલ બની ગયો હતો. ત્યારે લૉકડાઉન પહેલાથી જ કોઇ કર્મચારીને પગાર ના મળે તો તેની સ્થિતિ કેવી હોઈ શકે તે બાબતે વિચાર કરવાથી જ કંપારી છૂટી જઈ શકે છે. ગાંધીનગર સેક્ટર 25 જીઆઇડીસીમાં આવેલી કેમ્બે હોટલના કર્મચારીઓને જાન્યુઆરી 20 સંચાલકો દ્વારા પગાર ચૂકવવામાં આવ્યો નથી. તેને લઈને આજે ૨૦૦ જેટલા કર્મચારીઓ હડતાળ ઉપર ઉતરી ગયાં હતાં અને વહીવટીતંત્ર સામે હાય-હાયના નારા પોકાર્યા હતા.

હોટલમાં ફરજ બજાવતા મહિપાલસિંહ રાઓલે કહ્યું કે, જાન્યુઆરી મહિનાથી પગાર આપવામાં આવ્યો નથી. જેને લઇને અનેક વખત રજૂઆતો કરવામાં આવી છે. પરંતુ અમારી રજૂઆતોને ધ્યાનમાં ઉપર લેવામાં આવતી નથી. તેમના દ્વારા અમને એવું કહેવામાં આવી રહ્યું છે કે, તમારાથી થાય તે કરી લો પગાર મળશે નહીં. લૉકડાઉન દરમિયાન હોટલે એક રૂપિયાનો વકરો કર્યો નથી, જેથી તમને પગાર મળશે નહીં અને અન્ય જગ્યાએ નોકરી શોધી લો. જેને લઈને આજે અમારા હડતાળ પાડવામાં આવી હતી અને જ્યાં સુધી અમારો અગાઉનો પગાર મળશે નહીં ત્યાં સુધી અમે અમારા સ્ટેન્ડ ઉપર કાયમ રહીશું. બીજી તરફ આ બાબત હોટલના મેનેજર સાથે વાત કરવામાં આવતાં તેમણે આ બાબતે કંઈ પણ કહેવાનો ઇનકાર કર્યો હતો અને ધમકી આપતા હોય તે પ્રમાણેની ભાષા વાપરવામાં આવી હતી.