- ગુજરાત વિધાનસભામાં ટ્રેક્ટર સહાય માટેની અરજીના આંકડા સામે આવ્યાં
- 40 ટકા અરજીઓ સરકારે નામંજુર કરી
- રાજ્યમાં કુલ 51,122 અરજીઓ નામંજૂર
ગાંધીનગર: રાજ્ય સરકાર દ્વારા ખેડૂતોને ખેતર ખેડવા માટે ટ્રેક્ટર માટે આર્થિક સહાય આપવાની યોજના અમલમાં છે, ત્યારે છેલ્લા બે વર્ષની જો વાત કરવામાં આવે તો રાજ્ય સરકારને મળેલી કુલ અરજીઓમાંથી 40 ટકા અરજીઓ રાજ્ય સરકારે નામંજુર કરી છે. જ્યારે 27 હજારથી વધુ અરજીઓ હજુ પણ પડતર હોવાનું સામે આવ્યું છે.
40 ટકા અરજીઓ મંજૂર કરવામાં આવી
ગુજરાત વિધાનસભામાં કોંગ્રેસ પક્ષ દ્વારા ટ્રેક્ટર ખરીદીમાં સહાય મેળવવા મળેલી અરજીઓ બાબતે અનેક પ્રશ્નો પૂછવામાં આવ્યાં હતા. જેમાં સંકલિત માહિતી ભેગી કરતા રાજ્યમાં છેલ્લા બે વર્ષમાં ખેડૂતોએ ટ્રેક્ટર સહાય મેળવવા માટે 1,35,488 અરજીઓ મળી છે. તે પૈકી માત્ર 40 ટકા અરજીઓ જ મંજૂર કરવામાં આવી છે અને 40 ટકા અરજીઓ વિવિધ કારણોસર નામંજૂર કરવામાં આવી છે. જ્યારે ફક્ત 27,624 જેટલી અરજીઓ પડતર હોવાનું સામે આવ્યું છે.
દેવભૂમિ દ્વારકામાં સૌથી વધુ પડતર અરજી
સૌથી વધુ પડતા અરજીની જો વાત કરવામાં આવે તો દેવભૂમિ દ્વારકામાં 1486 જેટલી અરજીઓ હજુ પણ પડતર છે. દેવભૂમિ દ્વારકામાં કુલ 4357 જેટલી અરજીઓ કરવામાં આવી હતી. જેમાં 1317 અરજીઓ મંજૂર કરવામાં આવી છે અને 94 અરજીઓ નામંજૂર કરવામાં આવી છે. 1486 જેટલી અરજીઓ હજુ પણ પડતર હોવાનું સામે આવ્યું છે.
27,624 અરજીઓ હજુ પડતર
આમ છેલ્લા 2 વર્ષના આંકડાની વાત કરવામાં આવે તો કુલ 1,35,488 અરજીઓ 33 જિલ્લામાંથી મળી છે. જેમાં 54,758 અરજીઓ મંજૂર કરવામાં આવી છે, 51,122 અરજીઓ અમુક કારણોસર નામંજૂર કરવામાં આવી છે અને હજુ પણ આજની તારીખ સુધીમાં 27,624 અરજીઓ પડતર હોવાનું સામે આવ્યું છે.
આ પણ વાંચો : ગાંધીનગર - વિધાનસભા ગૃહના ત્રીજા દિવસે કૃષિ, રમતગમત સહિત અન્ય મુદ્દાઓ પર ચર્ચા કરવામાં આવી
