- આરોગ્ય વિભાગની બેઠકમાં નાયબ મુખ્યપ્રધાને કરી જાહેરાત
- અમદાવાદમાં કોરોનાના કેસ ઘટ્યા: નાયબ મુખ્યપ્રધાન
- બેઠકમાં અમદાવાદ સિવિલના OPDના સમયમાં વધારો કરાયો
ગાંધીનગર: ગુજરાતમાં કોરોનાના કહેર વચ્ચે રાજ્યના આરોગ્ય વિભાગની રિવ્યુ બેઠક મળી હતી. આજે 8 મહિના બાદ રાજ્યના આરોગ્ય પ્રધાન નીતિન પટેલની અધ્યક્ષતામાં આરોગ્ય વિભાગની બેઠક મળી હતી. જેમાં આરોગ્ય અગ્રસચિવ જયંતિ રવિ, આરોગ્ય કમિશનર તથા 8 મેડિકલ કોલેજના ડીન અને સરકારી આરોગ્ય વિભાગના ઉચ્ચ અધિકારીઓ હાજર રહ્યા હતા. બેઠકમાં કોરોનાની વર્તમાન સ્થિતિ, નવી મેડિકલ કોલેજ અને હોસ્પિટલ તથા મોરબીમાં કેન્દ્ર સરકારે મંજૂર કરેલી નવી મેડિકલ કોલેજ બાબતે ચર્ચા કરવામાં આવી હતી.
મોરબીમાં 100 બેડની નવી મેડિકલ કોલેજને મંજૂરી
રાજ્યના આરોગ્ય પ્રધાન નીતિન પટેલે જણાવ્યું હતું કે, આજે આરોગ્ય વિભાગની રિવ્યુ બેઠક મળી હતી. બેઠક દરમિયાન કેન્દ્ર સરકાર તરફથી મોરબીમાં 100 બેડની નવી મેડિકલ કોલેજન અને હોસ્પિટલને મંજૂરી આપવામાં આવી છે. આ મંજૂરીની જાણ બેઠક દરમિયાન કરવામાં આવી હતી. હવે મોરબીમાં પણ 100 બેડની મેડિકલ હોસ્પિટલ અને કોલેજ શરૂ કરવામાં આવશે.
અમદાવાદમાં કોરોનાનો કહેર ઘટ્યો, 84 ટકા કોરોનાના બેડ ખાલી
અમદાવાદમાં જે રીતે દિવાળી બાદ કોરોનાની સ્થિતિ વણસી હતી. દર્દીઓને ક્યાં દાખલ કરવા તે સરકારી તંત્ર માટે મોટો પ્રશ્ન બની ગયો હતો. ત્યારે આજે રાજ્યના આરોગ્ય પ્રધાન નીતિન પટેલે જણાવ્યું કે, દિવાળી બાદ અમદાવાદની સ્થિતિ જે રીતે ખરાબ થઈ હતી, સાશિયલ ડિસ્ટન્સનું પાલન કરાવવા 58 કલાકનો કરફ્યૂ અને ત્યારબાદ રાત્રી કરફ્યૂનું ફરજિયાત પાલન કરાવ્યા બાદ અમદાવાદમાં કોરોનાનો કહેર ઘટ્યો છે. સરકારી અને ખાનગી હોસ્પીટલમાં 84 ટકા કોરોનાના બેડ ખાલી રહ્યા હોવાનું પણ આરોગ્ય પ્રધાન નીતિન પટેલે જણાવ્યું હતું.
રાજકોટની AIIMS મુદ્દે કરાઈ ચર્ચા
આરોગ્ય પ્રધાન નીતિન પટેલે જણાવ્યું કે, એમની તૈયારીઓને લઈને તમામ પ્રકારની મંજૂરી આપી દેવામાં આવી છે. હોસ્પિટલની અંદર જોઈતા પ્લાન અંગે પણ માર્ગ અને મકાન વિભાગ દ્વારા તપાસ કરવામાં આવી છે. આ ઉપરાંત હોસ્પિટલનું બાંધકામનું કાર્ય પણ શરૂ થઈ રહ્યું હોવાનું રાજ્યના આરોગ્ય પ્રધાન નીતિન પટેલે જણાવ્યું હતું.
સોલા સિવિલમાં આપવામાં આવતી કોરોના વેક્સિનની કોઈ આડઅસર નહીં
અમદાવાદની સોલા સિવિલ હોસ્પિટલમાં કોરોના વેક્સિનની ટ્રાયલ શરૂ કરવામાં આવી છે. જેમાં અત્યાર સુધીમાં અનેક લોકોને રસી આપવામાં આવી છે. પરંતુ હજી સુધી એક પણ આડઅસરની ફરિયાદ આવી નહીં હોવાનું પણ નીતિન પટેલે જણાવ્યું હતું.
અમદાવાદ સિવિલમાં OPDના સમયમાં વધારો કરાયો
અમદાવાદની સ્થિતિ અને વસ્તીને ધ્યાનમાં રાખીને રાજ્ય સરકારે આજની બેઠકમાં જણાવ્યું હતું કે, અમદાવાદ સિવિલના OPDના સમયમાં પણ વધારો કરવામાં આવ્યો છે. પહેલાં સવારના 8 વાગ્યાથી બપોરના બે વાગ્યા સુધી કાર્ય કરવામાં આવતું હતું. જે વધારીને હવે ચારથી પાંચ વાગ્યા સુધી કરવામાં આવશે. આમ વધુ બે થી ત્રણ કલાકનો સમય OPDમાં વધઆરવામાં આવશે. અત્યારે સેન્ટરમાં નવા પાંચ જેટલા ઓપરેશન થિયેટર પણ શરૂ કરવામાં આવ્યા છે.
નવા વિદ્યાર્થીઓ માટે પ્રવેશ પ્રક્રિયા અને પરીક્ષા બાબતે આયોજન
બેઠકમાં નાયબ મુખ્યપ્રધાન નીતિન પટેલે જણાવ્યું કે, પ્રથમ વર્ષના મેડિકલના વિદ્યાર્થીઓને પ્રવેશ મેળવવા માટે તૈયારીઓ કરવામાં આવી રહી છે. આ સાથે જ પહેલા વર્ષના વિદ્યાર્થીઓને કઈ રીતે સગવડ આપવામાં આવશે તે બાબતે પણ ચર્ચા કરવામાં આવી હતી.
