વાપીમાં આગ લાગતા ભંગારના 7 ગોડાઉન બળીને ખાખ

વલસાડના વાપી ડુંગરી ફળિયામાં ભંગારના 7 ગોડાઉનમાં મોડી રાત્રિના સમયે આગ લાગવાની ઘટના બની હતી. ગોડાઉનમાં આગ લાગતા સ્થાનિકોમાં ગભરાટ ફેલાઈ ગયો હતો. સ્થાનિકો દ્વારા આ બનાવ અંગે ગોડાઉન સંચાલકો અને ફાયર વિભાગની ટીમને જાણ કરવામાં આવી હતી. ફાયર વિભાગની ટીમ ઘટનાસ્થળે પહોંચી આગ પર કાબૂ મેળવ્યો હતો.

• ડુંગરી ફળિયામાં આગની ઘટના
• આગમાં 7 ભંગારના ગોડાઉન બળીને ખાખ
• ફાયર વિભાગે આગ પર મેળવ્યો કાબૂ

વલસાડ : વાપીના ડુંગરી ફળિયા વિસ્તારમાં નાનામોટા અનેક ભંગારના ગેરકાયદેસર ગોડાઉન ધમધમી રહ્યા છે. જેમાં છાશવારે આગના બનાવો બને છે. એવો જ વધુ એક આગનો બનાવ બનતા GIDC ઉપરાંત આસપાસના ફાયર ફાઇટરની મદદથી આગ પર કાબૂ મેળવાયો હતો. આ આગ દુર્ઘટનામાં 7 ગોડાઉન બળીને ખાખ થઈ ગયા હતા.

7 ભંગારના ગોડાઉનમાં આગ લાગી

વલસાડના વાપી ડુંગરી ફળિયામાં આવેલા 7 ભંગારના ગોડાઉનમાં આગ લાગવાની ઘટના બની હતી. આ ઘટનાની જાણ સ્થાનિક લોકોને થતા તાત્કાલિક સ્થાનિક લોકોએ ભંગારના ગોડાઉન સંચાલકો, ફાયર ફાઇટર અને પોલીસ વિભાગને ઘટનાની જાણ કરવામાં આવી હતી. આ ભંગારના ગોડાઉનમાં લાગેલી આગ પર કાબૂ મેળવવા માટે વાપી ટાઉન અને વાપી GIDC સહિત આસપાસના વિસ્તારોમાંથી ફાયર ફાઈટરની ટીમની મદદ લેવામાં આવી હતી.

આગ લાગવાનું કારણ અકબંધ

ગત મધ્ય રાત્રિએ આ આગ લાગી હતી. જેથી ભંગારના ગોડાઉનમાં કોઈ હાજર ન હતું. આગ લાગવાનું કારણ જાણી શકાયું નથી. ભંગારના ગોડાઉનમાં છૂટાં પડેલા ભંગારના જથ્થાઓમાં આગ લાગતા સમગ્ર ગોડાઉન આગમાં ખાખ થઈ ગયું હતું.

ફાયર સેફટીના અભાવના કારણે બને છે આગની ઘટના

આ વિસ્તારમાં અનેક ગેરકાયદેસર ભંગારના ગોડાઉનો ધમધમતા હોય છાશવારે બનતી આગની ઘટનાથી આ વિસ્તારના લોકોના જીવ તાળવે ચોંટી જાય છે. કોઈપણ પ્રકારની ફાયર સેફટી વગર ધમધમતા આવા ગોડાઉન માલિકો પર તંત્ર તવાઈ બોલાવે તેવી માગ સ્થાનિક લોકો દ્વારા કરવામાં આવી રહી છે.