આરોપીઓને કોર્ટમાં રજૂ કરવાના સમયે RAT ટેસ્ટ મુદ્દે ગૃહવિભાગને કોઈ વાંધો નથી

પોલીસ આરોપીઓની ધરપકડ બાદ અને જ્યૂડિશિયલ અધિકારી સમક્ષ રજૂ કરતાં પહેલાં તેનો RT-PCR ટેસ્ટ નહીં પરંતુ રેપીડ એન્ટીજન ટેસ્ટ કરવામાં આવે તેવી ગુજરાત હાઇકોર્ટની ભલામણ બાદ રાજ્યના ગૃહવિભાગે આરોપીઓના રેપીડ એન્ટીજન ટેસ્ટ કરવાની તૈયારી બતાવી છે.

અમદાવાદઃ સૂત્રો દ્વારા મળતી માહિતી પ્રમાણે રાજ્યના પોલીસ વડાએ ગુજરાત હાઈકોર્ટને જણાવ્યું છે કે, આરોપીઓને કોર્ટમાં રજૂ કરવા સમયે રેપીડ એન્ટીજન ટેસ્ટ કરવામાં આવે તો તેમને કોઈ વાંધો નથી. ગુજરાત હાઇકોર્ટે કોરોના ચકાસવા માટે રેપીડ એન્ટીજન ટેસ્ટની ભલામણ કરતા મહત્વનું અવલોકન કરતાં કહ્યું કે, રેપીડ એન્ટીજન ટેસ્ટ વધુ એક્યુરેટ હોવાથી તેનો ઉપયોગ કરવામાં આવે. સાથે જ 24 કલાકમાં આરોપીને કોર્ટમાં જ્યૂડિશિયલ અધિકારી સમક્ષ રજૂ કરવાનો હોવાથી તેમાં પણ અનુરૂપ રહેશે.

ગુજરાત હાઇકોર્ટના જસ્ટિસ સોનિયા ગોકણીની અધ્યક્ષતાવાળી ડિવિઝન બેંચ સમક્ષ મહિલાના પતિ કે જે આરોપી છે એ 24 કલાકમાં કોર્ટ સમક્ષ કેમ રજૂ કરવામાં આવ્યાં નથી તે સંદર્ભમાં રાજ્ય સરકાર તરફે જણાવવામાં આવ્યું હતું કે કોરોના ટેસ્ટિંગમાં ટેસ્ટનું પરિણામ બાકી હોવાથી આરોપીને રજૂ કરવામાં આવ્યાં નથી ત્યારે કોર્ટ દ્વારા મહત્ત્વપૂર્ણ ભલામણ કરવામાં આવી હતી. હાઇકોર્ટે અવલોકન કર્યું કે આરોગ્ય અધિકારીઓ સાથે ચર્ચાવિચારણા કર્યા બાદ આ મુદ્દે રાજ્ય સરકાર નિર્ણય લઈ શકે. રાજ્ય સરકારે આ મુદ્દે નિષ્ણાત ડોક્ટરો અને પોલીસ અધિકારીઓ સાથે વાતચીત કરી જવાબ રજૂ કરવા માટે સમયની માગ કરી હતી.

આરોપીઓને કોર્ટમાં રજૂ કરવાના સમયે RAT ટેસ્ટ મુદ્દે ગૃહવિભાગને કોઈ વાંધો નથી