કોરોનાની સારવારમાં ખાનગી હોસ્પિટલની મનમાની, રાજ્ય સરકારના હસ્તક્ષેપ પછી શાન ઠેકાણે આવી

કોરોના વાઈરસની વૈશ્વિક મહામારી ગુજરાતમાં પ્રવેશી ત્યાર પછી સરકારી બેડની સંખ્યા ઓછી પડવા લાગી. ત્યાર પછી રાજ્ય સરકારે સારવાર માટે ખાનગી હોસ્પિટલને છૂટ આપી હતી. ખાનગી હોસ્પિટલોએ કોવિડ કેર સેન્ટર ખોલ્યા હતા. જો કે, ગુજરાતમાં ખાનગી હોસ્પિટલોએ મનફાવે તેવા ચાર્જિસ લેવાનું ચાલુ કર્યું હતું. જેની ખૂબ ટીકા થઈ અને રાજ્ય સરકારે હસ્તક્ષેપ કરીને ખાનગી હોસ્પિટલો સાથે ટાઈ અપ કર્યું હતું. ખાનગી હોસ્પિટલમાં કોરોનાની સારવાર નામે લૂંટ થઈ તેના પર જોઈએ ઈ ટીવી ભારતનો સ્પેશિયલ રિપોર્ટ...

અમદાવાદઃ ગુજરાતમાં કોરોના પોઝિટિવ કેસની સંખ્યા દિનપ્રતિદિન સતત વધતી જતી હતી, ત્યારે અને અમદાવાદની સિવિલ હોસ્પિટલમાં સારવારમાં ધાંધિયા થયા. સિવિલ હોસ્પિટલમાં દાખલ થયેલા દર્દીઓ પોતે વીડિયો ઉતારીને વાયરલ કરતાં હતા. સિવિલ હોસ્પિટલમાં અને સરકારી કોવિડ કેર સેન્ટરમાં સારવાર માટે કોઈ સીનિયર ડૉકટર આવતાં નથી. નર્સો પણ દિવસમાં એક વાર આવી જાય પછી કોઈ આવતું ન હતું. દર્દીઓને દવા આપવા પણ કોઈ આવતાં ન હતા. લંચ અને ડીનર યોગ્ય મળતું નથી, સમયસર મળતું ન હતું. સરકારી હોસ્પિટલમાં ચારેકોર ગંદકીના વીડિયો બહાર આવ્યા. આમ સરકારી હોસ્પિટલમાં દર્દીઓ રામભેરોસે હતા. આવા અનેક વીડિયો વાયરલ થયા પછી સરકાર સફાળી જાગી અને ખાનગી હોસ્ટિપલોને કોરોનાની સારવાર કરવા માટે પરવાનગી આપી. દર્દીઓને સરકારી હોસ્ટિપલો પર ભરોસો રહ્યો ન હતો.

કોરોનાની સારવારમાં ખાનગી હોસ્પિટલની મનમાની

વિશ્વની સૌથી મોટી હોસ્પિટલ સિવિલમાં મૃત્યુઆંક સૌથી વધારે હતો. જેથી દર્દીઓને ખાનગી હોસ્પિટલમાં સારવાર માટે દાખલ થવાની ફરજ પડી. કોરોના વાઈરસનો ચેપ લાગ્યો તેનો ભારે ગભરાટ અને તે ગભરાટનો લાભ લીધો ખાનગી હોસ્પિટલોએ. આ ખાનગી હોસ્પિટલોએ કોરોનાની સારવાર માટે લાખોના બિલ આપીને લૂંટ ચલાવી. સ્ટર્લીંગ હોસ્પિટલમાં કોરોનાની સારવારના 12થી 15 લાખનું પેકેજ હતું. અન્ય હોસ્પિટલોએ પણ લાખોના બિલ વસુલ્યા. આવા અનેક કિસ્સાઓ બહાર આવ્યા. રાજ્ય સરકારની ભારે ટીકા થઈ પછી રાજ્ય સરકારે લાલ આંખ કરી અને ખાનગી હોસ્પિટલો સાથે ટાઈ અપ કરીને કોરોનાની સારવારના ભાવ નક્કી કર્યા હતા. અને તમામ ખાનગી હોસ્પિટલમાં સરકારી બેડનો કવૉટા નક્કી થયો તે ખાલી રાખવાના. સરકારે જે ભાવ નક્કી કર્યા તે ભાવે તેમની સારવાર કરવામાં આવે, તેવું નક્કી થયું હતું.

કોરોનાની સારવારમાં ખાનગી હોસ્પિટલની મનમાની

કોરોના જેવી મહામારીના ઈલાજમાં ખાનગી હોસ્પિટલો દયાહીન બની હતી. અને દર્દીઓ પાસેથી લૂંટ ચલાવી હતી. ત્યાર પછી કોરોના ટેસ્ટિંગ વધારવાની વાત આવી ત્યારે રાજ્ય સરકારે ખાનગી લેબોરેટરીઓને છૂટ આપી. તો ખાનગી લેબોરેટરીઓએ કોરોના ટેસ્ટિંગના રૂપિયા 4500 પડાવ્યા હતા. અન્ય રાજ્યોની સરખામણીએ ચાર્જિસ વધારે હતા. જે મુદ્દે સરકારની ટીકા થઈ અને પછી સરકાર હરકતમાં આવી હતી. ડેપ્યુટી સીએમ અને આરોગ્યપ્રધાન નીતિન પટેલે સત્તાવાર જાહેરાત કરીને કોરોના ટેસ્ટિંગના ભાવ નક્કી કર્યા હતા. હાલ કોરોના ટેસ્ટિંગના રૂ.2500 અને ઘરે બોલાવો તો રૂ.3000 નક્કી કર્યા હતા. આમ કોરોનાની સારવારમાં ખાનગી હોસ્પિટલોએ ભલે ટ્રીટમેન્ટ સારી કરી હશે, પણ સામે લાખો રૂપિયા દર્દીઓ પાસેથી પડાવી લીધા છે.

કોરોનાની સારવારમાં ખાનગી હોસ્પિટલની મનમાની

ખાનગી હોસ્પિટલોમાં કોરોનાના દર્દીઓની સારવારનો મુદ્દો ગુજરાત હાઈકોર્ટમાં ચગ્યો હતો. હાઈકોર્ટે સરકારને કહ્યું હતું કે, દર્દીઓને યોગ્ય સારવાર આપવી એ રાજ્ય સરકારની ફરજ છે. અને ખાનગી હોસ્પિટલ આ રીતે લૂંટ ચલાવે છે તે યોગ્ય નથી. સુપ્રીમ કોર્ટે પણ ટીકા કરી હતી અને કહ્યું હતું કે સરકાર કોરોનાના દર્દીને મરવા માટે છોડી ન દેવા જોઈએ. તમામને યોગ્ય સારવાર મળે તેવી વ્યવસ્થા ગોઠવો. સુપ્રીમ કોર્ટ અને હાઈકોર્ટે સરકારનો કાન આમળ્યો પછી રાજ્ય સરકારે આદેશ કરીને ખાનગી હોસ્પિટલને કાબૂમાં લીધી હતી.

કોરોનાની સારવારમાં ખાનગી હોસ્પિટલની મનમાની