જિઓ અને BSNLના ગ્રાહકોમાં વધારો નોંધાયોઃ ટ્રાઈનો રિપોર્ટ

કોવિડ મહામારીના પગલે લોકડાઉન આવ્યું તેના એક મહિના અગાઉથી જ ટેલિકોમ ઇન્ડસ્ટ્રીને મંદીની અસર અનુભવાતી હતી. ગુજરાતમાં આ ઇન્ડસ્ટ્રીના ગ્રાહકોની સંખ્યામાં ઘટાડો જારી છે, પરંતુ જિઓ અને BSNLએ ફેબ્રુઆરી 2020માં પણ તેના ગ્રાહકોમાં વધારો નોંધાવ્યો હતો.

અમદાવાદ- ટેલિકોમ રેગ્યૂલેટરી ઓથોરિટી ઓફ ઇન્ડિયા (ટ્રાઈ)એ 29 ફેબ્રુઆરી, 2020 સુધીના મોબાઇલ ગ્રાહકોના આંકડા અંગે એક રીપોર્ટ જારી કર્યો હતો. આ રીપોર્ટમાં કહેવામાં આવ્યું છે કે, ઉપરોક્ત સમયગાળામાં જિઓએ 2.92 લાખ ગ્રાહકોનો અને BSNLએ 13,000 ગ્રાહકોનો વધારો નોંધાવ્યો છે. આ વધારા સાથે જિઓના કુલ 2.36 કરોડ ગ્રાહકો થયા છે અને BSNLના 61.11 લાખ ગ્રાહકો છે.

જિઓ અને BSNLના ગ્રાહકોમાં વધારો નોંધાયોઃ ટ્રાઈનો રિપોર્ટ

જાન્યુઆરી 2020માં ગુજરાતમાં કુલ મોબાઇલ ગ્રાહકોની 6.79 કરોડની સંખ્યામાં ફેબ્રુઆરી 2020 સુધીમાં 6.87 લાખ ગ્રાહકોનો ઘટાડો નોંધાયો હતો. આ ઘટાડામાં સૌથી વધુ 9.84 લાખ ગ્રાહકો વોડાફોન આઇડિયાએ અને એ પછી 9,000 ગ્રાહકો એરટેલે ગુમાવ્યાં છે. ગુજરાતમાં ફેબ્રુઆરી સુધીમાં ગ્રાહકોના ઘટાડા બાદ પણ વોડાફોન આઇડિયા 2.63 કરોડ ગ્રાહકો સાથે કસ્ટમર માર્કેટ શેરની દૃષ્ટિએ લીડર છે. જ્યારે ગ્રાહકોના ઘટાડા બાદ એરટેલ પાસે 1.10 કરોડ ગ્રાહકો છે.ફેબ્રુઆરીની સ્થિતિએ ગુજરાતમાં કુલ 6.72 કરોડ મોબાઇલ ગ્રાહકો છે, જેમાં વોડાફોન આઇડિયાનો કસ્ટમર માર્કેટ શેર 39.23 ટકા છે. ગુજરાતમાં બીજા નંબરે સૌથી વધુ ગ્રાહકો ધરાવતાં જિઓનો કસ્ટમર માર્કેટ શેર 35.22 ટકા છે. એ પછી 16.45 ટકા સાથે એરટેલ અને 9.09 ટકા BSNLનો નંબર આવે છે.રીપોર્ટમાં જણાવ્યા મુજબ ફેબ્રુઆરી સુધીમાં ભારતમાં કુલ 116.05 કરોડ મોબાઇલ ગ્રાહકો છે. જ્યારે આ સંખ્યામાં ઉમેરાયેલા નવા ગ્રાહકોની સંખ્યા 41.46 લાખ છે. ઉપરોક્ત સમયગાળા દરમિયાન સમગ્ર દેશમાં જિઓના 62.57 લાખ ગ્રાહકો વધ્યાં હતાં, એ પછી એરટેલે 9.22 લાખ અને BSNLએ 4.39 લાખ ગ્રાહકો ઉમેર્યા હતાં. વોડાફોન આઇડિયાએ સમગ્ર દેશમાં કુલ 34.67 લાખ ગ્રાહકોનો જંગી ઘટાડો નોંધાવ્યો છે.