અમદાવાદ: વેપારીની પુત્રીના ફોટા વાયરલની ધમકી આપી કોન્સ્ટેબલે 15 લાખ માગ્યા

હાલ કોરોનાની મહામારી વચ્ચે પોલીસની કામગીરી લોકોએ ખુબ જ વખાણી છે, ત્યારે પોલીસને દાગ લાગે એવી ઘટના સામે આવી છે. નિકોલના એક વેપારીને ઓઢવના કોન્સ્ટેબલે ધમકી આપી છે. વેપારીની દીકરીના ફોટો વીડિયો વાયરલ કરી દેવાની ધમકી આપી યુવતીની બહેનપણી સાથે મળીને 15 લાખની માગણી કરી છે. સમગ્ર મામલે ક્રાઇમ બ્રાન્ચમાં ફરિયાદ નોંધાતા પોલીસે તપાસ હાથ ધરી છે.

અમદાવાદ: શહેરના નિકોલ વિસ્તારમાં રહેતા વેપારી એમ્બ્રોડરી કારખાનું ધરાવી વેપાર કરે છે. જેમને પરિવારમાં બે પુત્રી, એક પુત્ર અને પત્ની છે. વેપારીની 22 વર્ષની પુત્રીએ ગ્રેજ્યુએશન પૂર્ણ કરી હાલ ઘરકામ કરે છે. ગત 22 મીએ એક અજાણ્યા નંબર પરથી આ વેપારીને મિસકોલ આવ્યો હતો. જેથી ફરીથી કોલ કરતા ફોન કરનારે નામ પૂછીને ફોન મૂકી દીધો હતો. બાદમાં વોટ્સએપ મેસેજ આવ્યો હતો જેમાં તારી દીકરી કોલેજ કરતી હતી ત્યારે કેવા કેવા ધંધા કરતી હતી કોની સાથે ફરતી હતી એ બધા ફોટો વીડિયો છે. મારા સુધી પહોંચવાની કોશિશ કરશો તો આ બધા ફોટો વીડિયો વાયરલ કરી દઈશ આવી ધમકી આપી ફોન મેસેજ કરનારે 15 લાખ માગ્યા હતા.

ધમકી મળ્યા બાદ વેપારી સાયબર ક્રાઇમ પોલીસ મથકે ગયા હતા જ્યાં સાયબર ક્રાઇમે તપાસ કરી તો ઓઢવ પોલીસ સ્ટેશનના કોન્સ્ટેબલ દશરથસિંહ નવલસિંહ પરમારે આ મેસેજ કોલ કર્યા હોવાનું જાણવા મળ્યું હતું. વેપારી પર ફરી ફોન મેસેજ આવતા 15 લાખની હમણાં વ્યવસ્થા નહીં થઈ શકે તેવું કહેતા, કોન્સ્ટેબલએ ધમકી આપી કે, જ્યાં ફરિયાદ કરવી હોય ત્યાં કરજે થોડો સમય જેલમાં રહીને બહાર આવીશ પછી નુકશાન તને જ થશે. આ બાબતને લઈને ક્રાઇમ બ્રાન્ચમાં ફરિયાદ આપતા પોલીસે કોન્સ્ટેબલ દશરથસિંહ પરમાર અને યુવતી રૂપલ મહેસૂરિયા સામે આઇપીસી 385, 507 અને 34 મુજબ ફરિયાદ નોંધી તપાસ હાથ ધરી છે.ક્રાઇમ બ્રાન્ચના એસીપી બી.વી. ગોહિલે જણાવ્યું કે, આરોપી કોન્સ્ટેબલની ધરપકડ કરાઈ છે. તેને રૂપિયાની જરૂર હોવાથી યુવતીની સ્ત્રી મિત્ર સાથે મળીને આ કાવતરું રચ્યું હતું અને હાલ ધરપકડ કરી કોરોના ટેસ્ટ કરાવવા મોકલાયા છે સાથે એ પણ કહ્યું કે, યુપી જનાર એક વ્યક્તિનો ફોન પડી ગયો હતો અને તે ફોન જમા લઈને તેના નંબર પરથી કોન્સ્ટેબલે આ ધમકી આપી ખંડણી માગી હતી જે અંગે પૂછપરછ કરવામાં આવશે.