AIMIMએ પૂર્વ ધારાસભ્ય સાબિર કાબલીવાલાને ગુજરાતના પ્રદેશ પ્રમુખ બનાવ્યા

અસદુદ્દીન ઓવૈસીની ઑલ ઇન્ડિયા મજલિસ-એ-ઇત્તેહાદુલ મુસ્લિમીન (AIMIM) પાર્ટી ગુજરાતમાં સ્થાનિક સ્વરાજ્યની ચૂંટણી લડી રહી છે, ત્યારે જમાલપુરના પૂર્વ ધારાસભ્ય સાબિર કાબલીવાલાને પાર્ટીના પ્રદેશ પ્રમુખ બનાવવામાં આવ્યા છે.

• AIMIM ગુજરાતમાં સ્થાનિક સ્વરાજ્યની ચૂંટણી લડશે
• સાબિર કાબલીવાલા ગુજરાતના પ્રદેશ પ્રમુખ બન્યા
• ઓવૈસીએ સત્તાવાર ટ્વીટ કરીને શુભેચ્છા પાઠવી

અમદાવાદઃ ગુજરાતમાં સ્થાનિક સ્વરાજ્યની ચૂંટણીની તૈયારીઓ કરવા માટે AIMIM પાર્ટીના પ્રતિનિધિઓ નવા વર્ષની શરૂઆતમાં જ 2 દિવસીય મુલાકાત માટે અમદાવાદ આવ્યા હતા. AIMIM પાર્ટીના રાષ્ટ્રીય પ્રવક્તા વારીશ પઠાણ અને મહારાષ્ટ્ર ઔરંગાબાદથી લોકસભા સાંસદ ઈમ્તિયાઝ જલીલે અમદાવાદની મુલાકાત લીધી હતી. અમદાવાદ એરપોર્ટ પર શાબિર કાબલીવાલા સહિત કેટલાક નેતાઓ દ્વારા તેમનું સ્વાગત કરવામાં આવ્યું હતું. આ અમદાવાદ મુલાકાત વખતે જ AIMIMનું પ્રમુખ પદ કોને સોંપવું તે અંગે પણ વિચારણા થઈ હતી, તે વખતે સાબિર કાબલીવાલાનું નામ ચર્ચામાં આવ્યું હતું. આજે મંગળવારે ઓવૈસીએ સત્તાવાર રીતે ટ્વીટ કરીને જાણ કરી હતી અને અભિનંદન પાઠવ્યા હતા.

AIMIMએ સાબિર કાબલીવાલાને ગુજરાતના પ્રદેશ પ્રમુખ બનાવ્યા

પાર્ટીએ સ્થાનિક સ્વરાજ્યની ચૂંટણી અંગે રણનીતિ જાહેર કરી નથી

અમદાવાદની મુલાકાતે આવેલા AIMIM પાર્ટીના પ્રતિનિધિઓ કેટલાક બુદ્ધિજીવી રાજનેતાઓ અને લોકો સાથે મુલાકાત કરી હતી અને ક્યાં ક્યાં વિસ્તારમાં ચૂંટણી લડી શકાય તેના પર ચર્ચા થઈ હતી. નોંધનીય છે કે, થોડાક દિવસ પહેલા AIMIMના વારીસ પઠાણે સુરત શહેરની મુલાકાત લીધી હતી. આ અગાઉ વારીસ પઠાણ દ્વારા કરવામાં આવેલી ટ્વીટમાં જણાવવામાં આવ્યું હતું કે, પાર્ટી અધ્યક્ષ અસદુદ્દીન ઓવૈસીના નિર્દેશ પર તેઓ ગુજરાત આવ્યા છે. સ્થાનિક સ્વરાજ્યની ચૂંટણી આગળ પાર્ટીની શું રણનીતિ રહેશે એ અંગે હાલ કઈ જણાવવામાં આવ્યું નથી.

BTP સાથે મળીને ચૂંટણી લડશે

ઉલ્લેખનીય છે કે, રાજ્યની સ્થાનિક સ્વરાજ્યની ચૂંટણીમાં છોટુ વસાવાની BTP-ઓવેસીની AIMIM પાર્ટી સાથે મળીને ચૂંટણી લડશે. આ વખતે આમ આદમી પાર્ટીએ પણ સ્થાનિક સ્વરાજ્યની ચૂંટણી તમામ બેઠકો પરથી લડવાની જાહેરાત કરી છે.