અમદાવાદઃ કોરોના એક એવી બીમારી છે, જેમાં લોહીમાં પ્રાણવાયુની માત્રા ઓછી થઈ જાય છે. જેથી હૃદય, ફેફસાં, શરીરના અન્ય ભાગો તથા મગજને જરૂરી પ્રમાણમાં પ્રાણવાયુ મળી શકતો નથી. જેની અવગણના જીવલેણ પણ સાબિત થઈ શકે છે.
આમ આદમી પાર્ટી ગુજરાતમાં 1 સપ્ટેમ્બરથી પ્રદેશ ઉપપ્રમુખ ગોપાલભાઈ ઇટાલિયાની આગેવાનીમાં યુવા જોડો અભિયાન શરૂ કરવા જઇ રહી છે. સાથે-સાથે સમગ્ર રાજ્યમાં 1000 તપાસ કેન્દ્ર ખોલશે અને 5000થી વધુ કાર્યકર્તાઓ લોકોનું ઓક્સિજન લેવલ ઘરે-ઘરે જઈ તપાસ કરશે. તેઓ ઓક્સીમિત્ર બની ઓક્સીમિટર અને સેનિટાઈઝર તથા માસ્ક અને પૂરતી સોશિયલ ડિસ્ટનસિંગના પાલન સાથે ગુજરાતભરમાં બુથ લેવલ પર જઈને ઓક્સિજનની માપણી કરશે અને જો ઓછું જણાય તો તેમને હોસ્પિટલમાં દાખલ કરવામાં મદદ કરશે.
કોરોના મહામારીમાં દિલ્હી મોડલની સફળતા અને આમ આદમી પાર્ટીની દિલ્હી સરકાર દ્વારા જનતા લક્ષી કરેલા કાર્યો વિશે લોકોને માહિતગાર કરવામાં આવશે અને પ્રચાર પ્રસાર તથા કાર્યકર્તા જોડો અભિયાન ચલાવવામાં આવશે.
આ સાથે આમ આદમી પાર્ટીના ગુજરાતમાં વધતા જતા સંગઠન અને કાર્યો તેમજ ગુજરાત સરકારની નિષ્ફળતાનો પણ ચિતાર અને આમ આદમી પાર્ટી જ કેમ શ્રેષ્ઠ વિકલ્પ છે, તે વિશે જનતાને જણાવવામાં આવશે.
