બંગાળમાં મંગળવારે ભાજપના દિગ્ગજ નેતાઓ ચૂંટણી પ્રચાર કરશે

પશ્ચિમ બંગાળ વિધાનસભા ચૂંટણીને ધ્યાનમાં રાખી ભાજપ આક્રમક અંદાજથી પ્રચાર કરી રહી છે. મંગળવારે ભાજપની 7 રેલી યોજાશે. ઉત્તરપ્રદેશના મુખ્યપ્રધાન યોગી આદિત્યનાથ, સંરક્ષણ પ્રધાન રાજનાથસિંહ ત્રણ-ત્રણ સભા ગજવશે. આ ઉપરાંત ભાજપના પ્રમુખ જે. પી. નડ્ડા વિષ્ણુપુરમાં રોડ શૉ સાથે એક રેલીને પણ સંબોધિત કરશે.

• બંગાળમાં ચૂંટણીને ધ્યાનમાં રાખી ભાજપ આક્રમક અંદાજમાં
• પશ્ચિમ બંગાળમાં ભાજપ 7 રેલીઓનું આયોજન કરશે
• રાજનાથસિંહ, જે. પી. નડ્ડા, યોગી આદિત્યનાથ જેવા દિગ્ગજ નેતા ગજવશે સભા

આ પણ વાંચોઃ બંગાળની જનતા પરિવર્તન ઇચ્છે છેઃ કેન્દ્રીયપ્રધાન નીતિન ગડકરી સાથે મુલાકાત

કોલકાતાઃ પશ્ચિમ બંગાળમાં 8 તબક્કામાં વિધાનસભાની ચૂંટણી યોજાશે. આ પહેલા તમામ પાર્ટીઓએ પ્રચારમાં પોતાની સંપૂર્ણ તાકાત લગાવી દીધી છે. તૃણમૂલ સુપ્રીમો મમતા બેનરજી વ્હિલચેર પર હોવા છતા છેલ્લા 2 દિવસથી સતત જનસંપર્ક કરવાનો પ્રયત્ન કરી રહ્યાં છે. ભાજપ પણ મમતાના જવાબમાં સતત ચૂંટણી રેલીઓ અને રોડ શૉનું આયોજન કરી રહી છે. આ અંતર્ગત જ મંગળવારે ભાજપ કુલ 7 રેલીનું આયોજન કરશે, જેમાં સંરક્ષણ પ્રધાન રાજનાથ સિંહ, ભાજપના રાષ્ટ્રીય અધ્યક્ષ જે. પી. નડ્ડા અને ઉત્તરપ્રદેશના મુખ્યપ્રધાન યોગી આદિત્યનાથ ઉપસ્થિત રહેશે.

આ પણ વાંચોઃ યશવંત સિન્હાને TMCમાં મળી મોટી જવાબદારી, કાર્યસમિતિમાં પણ શામેલ

બંગાળની ચૂંટણી જીતવા ભાજપના દિગ્ગજ નેતા મેદાને

આ અંગે મળતી માહિતી અનુસાર, ઉત્તરપ્રદેશના મુખ્યપ્રધાન યોગી આદિત્યનાથ મંગળવારે પુરુલિયા, બાંકુડા અને મોદિનીપુરમાં જનસભા સંબોધશે. આ સાથે જ સંરક્ષણ પ્રધાન રાજનાથ સિંહ દાસપુર, સબાંગ અને સલબોનીમાં જનસભા સંબોધશે. આ ઉપરાંત ભાજપના રાષ્ટ્રીય અધ્યક્ષ જે. પી. નડ્ડા વિષ્ણુપુરમાં રોડ શૉ કરશે તેમજ કોતુલપુરમાં રેલી પણ યોજશે.