ઉત્તરાખંડ : કેદારનાથથી એક મોટા સમાચાર સામે આવ્યા છે. કેદારનાથમાં હેલિકોપ્ટરના રોટર સાથે અથડાતાં UCADA અધિકારીનું મોત થયું છે. જણાવવામાં આવી રહ્યું છે કે કેદારનાથમાં હેલિકોપ્ટરની પાછળના રોટર સાથે અથડાવાથી UCADAના ફાયનાન્સ કંટ્રોલર અમિત સૈનીનું મોત થયું છે.
હેલિકોપ્ટરની ટક્કરથી અધિકારીનું મોત : ડિઝાસ્ટર મેનેજમેન્ટ ઓફિસર નંદન સિંહ રાજવારે આ દુર્ઘટનાની જાણકારી આપી છે. તેમણે જણાવ્યું કે હેલિકોપ્ટરના ટેલ રોટર દ્વારા માથું કાપી નાખવામાં આવ્યા બાદ GMVN હેલિપેડ કેદારનાથ ખાતે 2.15 વાગ્યે જનરલ મેનેજર ફાઇનાન્સ (UCADA) અમિત સૈનીનું અવસાન થયું. નોંધપાત્ર વાત એ છે કે, UCADA ટીમ કેદારનાથ યાત્રાની વ્યવસ્થાની સમીક્ષા કરવા ગઈ હતી.
હેલિપેડનું નિરિક્ષણ કરવા જતા બનાવ બન્યો : મળતી માહિતી મુજબ, UCADA ના ફાયનાન્સ કંટ્રોલર અમિત સૈની ક્રિસ્ટલ એવિએશનના હેલિકોપ્ટર દ્વારા કેદારનાથ હેલિપેડ પર નિરીક્ષણ માટે ગયા હતા. કેદારનાથમાં ઉતર્યા બાદ જ્યારે અમિત હેલિકોપ્ટરમાંથી નીચે ઉતરી રહ્યો હતો ત્યારે હેલિકોપ્ટરની પાછળના રોટર સાથે અથડાવાને કારણે તેનું ઘટનાસ્થળે જ મોત થયું હતું.
બેદારકારીની થશે તપાસ : કોની બેદરકારીના કારણે આ દુર્ઘટના બની, તેની માહિતી મેળવવામાં આવી રહી છે. ક્રિસ્ટલ એવિએશનના હેલિકોપ્ટર સાથેના આ અકસ્માતની તપાસ કરવામાં આવશે. ત્યાર બાદ જ કોઈ હકીકત બહાર આવશે. બીજી તરફ સૂત્રોનું માનીએ તો, લેન્ડિંગ બાદ પાછળનું રોટર બંધ ન થવાને કારણે આ અકસ્માત થયો છે, જે એક મોટી બેદરકારી છે. ઉલ્લેખનીય છે કે, ગયા વર્ષે પણ કેદારનાથમાં એક હેલિકોપ્ટર ક્રેશ થયું હતું, જેમાં સાત લોકોના મોત થયા હતા. થોડા વર્ષો પહેલા પણ હેલી સેવાના કર્મચારીનું રોટર અથડાતા મૃત્યુ થયું હતું.
25 એપ્રિલથી યાત્રાનો પ્રારંભ થશે : આ વખતે કેદારનાથ યાત્રા 25 એપ્રિલથી શરૂ થવા જઈ રહી છે. જો કે, 22 એપ્રિલે ગંગોત્રી અને યમુનોત્રીના દરવાજા ખોલવાની સાથે ચારધામ યાત્રા શરૂ થઈ ગઈ છે. જ્યારે બદ્રી વિશાલના દરવાજા 27 એપ્રિલે ખુલશે. કેદારનાથ યાત્રાની તૈયારીઓ પૂરજોશમાં ચાલી રહી છે. કેદારઘાટીમાં હિમવર્ષાના કારણે વહીવટીતંત્રને કેદારનાથ પગપાળા માર્ગ અને ધામમાં વ્યવસ્થા કરવામાં મુશ્કેલીનો સામનો કરવો પડી રહ્યો છે. બીજી તરફ, કેદારનાથ યાત્રા પહેલા આ ઘટના બની તે ખૂબ જ દુઃખદ છે.
