- વડાપ્રધાન મોદી બુધવારે પહોંચ્યા અમેરિકાના પ્રવાસે
- CEO સાથેની બેઠકમાં ભારતના વિકાસના વખાણ
- આજે શુક્રવારે અમેરિકન પ્રેસિડન્ટ સાથે કરશે બેઠક
વોશિંગ્ટન: PM મોદીના અમેરિકા પ્રવાસને લઈને વિદેશ સચિવ હર્ષવર્ધન શ્રૃંગલાએ જણાવ્યું હતું કે, વડાપ્રધાનની અમેરિકાના ટોચના CEO સાથેની બેઠક દરમિયાન તેઓએ ભારતમાં હાલમાં થયેલા સુધારાઓના વખાણ કર્યા હતા અને દેશમાં રોકાણ માટે મહત્વપૂર્ણ અવસર હોવાનું જણાવ્યું હતું. વડાપ્રધાન મોદીએ બુધવારે યોજેલી બેઠકોમાં ભારતમાં રોકાણની વ્યાપક સંભાવનાઓ જણાવીને પ્રોત્સાહિત કર્યા હતા.
ભારતમાં રોકાણની નોંધપાત્ર તકો
વડાપ્રધાન મોદી બુધવારે અમેરિકાની સત્તાવાર મુલાકાતે પહોંચ્યા હતા. તેમના પ્રવાસની શરૂઆતમાં, તેમણે ક્વોલકોમ, એડોબ, ફર્સ્ટ સોલર, જનરલ એટોમિક્સ અને બ્લેક સ્ટોનનાં સીઈઓ સાથે અલગ બેઠક યોજી હતી. આ તે કંપનીઓ છે. જે 5G, સેમિકન્ડક્ટર, ડિફેન્સ ટેકનોલોજી, રિન્યુએબલ એનર્જી જેવા ક્ષેત્રોમાં વિશ્વમાં પ્રખ્યાત છે. બેઠક બાદ વિદેશ સચિવ શ્રૃંગલાએ પત્રકારોને જણાવ્યું હતું કે, ભારતમાં તાજેતરના સુધારાના પગલાંની પ્રશંસા કરીને તેમણે સ્પષ્ટ સંદેશ આપ્યો છે. આ પગલાંઓએ ભારતમાં વ્યવસાયનું વાતાવરણ વધુ અનુકૂળ બનાવ્યું છે. વિવિધ ક્ષેત્રોમાં ઉદાર રોકાણના નિયમો બનાવ્યા છે અને તેમને સમજાયું છે કે, ભારતમાં રોકાણની નોંધપાત્ર તકો છે.
વડાપ્રધાન મોદી યોજશે જો બાઈડેન સાથે બેઠક
તેમણે વધુમાં કહ્યું હતું કે, આ તમામ કંપનીના CEO ભારતને લઈને ખૂબ જ આશાવાદી હતા. તેમણે ભારતને વિશ્વની કંપનીઓ માટે વૃદ્ધિ માટે ટોચનું સ્થળ ગણાવ્યું હતું. PM મોદી તેમની મુલાકાત દરમિયાન શુક્રવારે અમેરિકી રાષ્ટ્રપતિ જો બાઈડેન સાથે તેમની પ્રથમ બેઠક યોજશે. ઉદ્યોગપતિઓને મળતા પહેલા મોદીએ કહ્યું હતું કે, તેઓ મોટી કંપનીઓના CEOને મળશે અને ભારતમાં આર્થિક તકો વિશે વાત કરશે.
ફર્સ્ટ સોલર ભારતમાં કરી ચૂકી છે મહત્વપૂર્ણ રોકાણત
ફર્સ્ટ સોલરે ભારતમાં સફળતાપૂર્વક 150 મેગાવોટના સોલાર પ્લાન્ટની શરૂઆત કરી છે અને દેશમાં 1800 મેગાવોટ સૌર ક્ષમતા સ્થાપિત કરી છે. આ વર્ષની શરૂઆતમાં, કંપનીએ ભારતમાં નવું 3300 મેગાવોટ ક્ષમતાનું એકમ સ્થાપવાની જાહેરાત કરી હતી. કંપની 2022 સુધીમાં ભારતના એક લાખ મેગાવોટ સૌર ઉર્જા ઉત્પાદન ક્ષમતાના લક્ષ્યને પૂર્ણ કરવામાં યોગદાન આપી રહી છે. મંત્રાલયના જણાવ્યા અનુસાર, વડાપ્રધાને 2030 સુધીમાં 4,50,000 મેગાવોટ નવીનીકરણીય ઉર્જા ક્ષમતા સ્થાપિત કરવાના ભારતના લક્ષ્યનો પણ ઉલ્લેખ કર્યો હતો. તેમણે સૌર ઉર્જા સંસાધનોના ઉત્પાદન પર ભારતના ભાર વિશે પણ વાત કરી હતી. એડોબના CEO શાંતનુ નારાયણ સાથેની બેઠકમાં વડાપ્રધાને કંપનીની ભારતમાં ચાલી રહેલી પ્રવૃત્તિઓ અને ભાવિ રોકાણ યોજનાઓ પર ચર્ચા કરી હતી.
